டென்மார்க்கின் தன்னாட்சிப் பகுதியான கிரீன்லாந்தை (Greenland) அமெரிக்காவுடன் இணைத்துக்கொள்ளப் போவதாக அதிபர் டொனால்ட் ட்ரம்ப் விடுத்துள்ள மிரட்டலைத் தொடர்ந்து, அமெரிக்காவுடனான புதிய வர்த்தக ஒப்பந்தத்தை நடைமுறைப்படுத்துவதை இடைநிறுத்த ஐரோப்பிய ஒன்றியம் ஆலோசித்து வருகின்றது.
வெனிசுலா சம்பவத்திற்குப் பின் அதிகரித்த அச்சம்: சமீபத்தில் வெனிசுலாவில் அமெரிக்கப் படைகள் மேற்கொண்ட அதிரடி இராணுவ நடவடிக்கையின் மூலம் முன்னாள் அதிபர் நிக்கோலஸ் மதுரோ (Nicolas Maduro) கைது செய்யப்பட்டு, அமெரிக்கத் தடுப்புக்காவல் மையத்திற்கு மாற்றப்பட்டார். இந்தச் சம்பவத்தைத் தொடர்ந்து, கிரீன்லாந்து விவகாரத்தில் ட்ரம்ப் விடுத்துள்ள மிரட்டல்களை ஐரோப்பிய நாடுகள் மிகவும் தீவிரமாகப் பார்க்கத் தொடங்கியுள்ளன.
வர்த்தக ஒப்பந்தத்தில் இழுபறி: அமெரிக்கப் பொருட்களுக்கான இறக்குமதி வரிகளை நீக்குவது தொடர்பான வாக்கெடுப்பு ஜனவரி 26-27 தேதிகளில் ஐரோப்பிய பாராளுமன்றத்தில் நடைபெறவிருந்தது. எனினும், தற்போதைய பதற்றமான சூழலில் இந்த வாக்கெடுப்பை ஒத்திவைக்க வேண்டுமென பாராளுமன்ற உறுப்பினர்கள் (MEPs) வலியுறுத்தி வருகின்றனர்.
கிரீன்லாந்து ஏன் அமெரிக்காவிற்குத் தேவை? வியூகம் மிக்க அமைவிடம் மற்றும் கனிம வளங்கள் நிறைந்த ஆர்க்டிக் பிராந்தியத்தை (Arctic region) ரஷ்யாவோ அல்லது சீனாவோ ஆக்கிரமிப்பதைத் தடுக்க கிரீன்லாந்து அமெரிக்காவின் வசமிருக்க வேண்டும் என ட்ரம்ப் மீண்டும் மீண்டும் கூறி வருகின்றார். கிரீன்லாந்தை விலைக்கு வாங்க சுமார் 700 பில்லியன் டாலர்கள் வரை செலவாகும் என மதிப்பிடப்பட்டுள்ளது. இது அமெரிக்காவின் மொத்த பாதுகாப்பு வரவு செலவுத் திட்டத்தில் பாதிக்கும் மேலதிகமான தொகையாகும்.
