இஸ்ரேல் அணிக்கு எதிராக அயர்லாந்து பரபரப்பு குற்றச்சாட்டு

யூ.ஈ.எப்.ஏ நேஷன்ஸ் லீக் (UEFA Nations League) தொடரின் ஒரு பகுதியாக அயர்லாந்து மற்றும் இஸ்ரேல் அணிகளுக்கு இடையிலான கால்பந்து போட்டிகள் பெரும் அரசியல் பதட்டங்களுக்கும் சர்ச்சைகளுக்கும் மத்தியில் நிறைவடைந்துள்ளன.

இந்தத் தொடரின் இரண்டாவது மற்றும் இறுதிப் போட்டி நேற்று (04) நடைபெற்றது. விறுவிறுப்பாகச் சென்ற இந்த ஆட்டம் 1-1 என்ற கோல் கணக்கில் சமனில் முடிவடைந்தது.

காசா மீதான இஸ்ரேலின் போரை அயர்லாந்து கடுமையாக எதிர்த்து வருவதால், இந்தப் போட்டிகளைப் புறக்கணிக்க வேண்டும் என்று அயர்லாந்தில் அரசியல்வாதிகளும் பொதுமக்களும் தொடர்ச்சியாகக் குரல் கொடுத்து வந்தனர்.

இதன் காரணமாக, பாதுகாப்பு மற்றும் அரசியல் அழுத்தங்களைக் கருத்தில் கொண்டு, முதல் போட்டி ஹங்கேரியிலும், நேற்று நடைபெற்ற இரண்டாவது போட்டி செர்பியாவிலும் பார்வையாளர்கள் அனுமதியின்றி (Behind closed doors) இரகசியமாக நடத்தப்பட்டன.

இருப்பினும், பார்வையாளர்கள் இன்றி நடைபெற்றாலும் களத்தில் பதட்டம் குறையவில்லை. முதல் பாதி ஆட்டம் முடிந்து வெளியேறியபோது, இஸ்ரேலிய வீரர் ஒருவர் தனது முகத்தில் துப்பியதாக அயர்லாந்து பயிற்சியாளர் குழுவைச் சேர்ந்த டேமியன் டோய்ல் (Damien Doyle) பகிரங்கமாகக் குற்றம்சாட்டினார்.

இந்தக் குற்றச்சாட்டு குறித்து கால்பந்து வாரியத்தின் ஒழுங்கு நடவடிக்கை குழு (Disciplinary Committee) தீவிர விசாரணை நடத்தும் என்று எதிர்பார்க்கப்படுகிறது.

போட்டிகள் நிறைவடைந்த பிறகு செய்தியாளர்களிடம் பேசிய அயர்லாந்தின் பயிற்சியாளர் ஹெய்மிர் ஹால்ட்ரிம்சூன் (Heimir Hallgrimsson), “இந்தத் தொடர் முடிவடைந்துவிட்டது என்பதில் நான் முழு மகிழ்ச்சியடைகிறேன். கடந்த இரண்டு வாரங்களாக நாங்கள் எதிர்கொண்ட கடுமையான சூழ்நிலையை எந்தவொரு தேசிய அணியும் சந்திக்கக் கூடாது” என்று கூறினார்.