சவூதி அரேபியாவில் மரண தண்டனை விதிக்கப்பட்டுள்ள இலங்கையரான சிவராசா அனோஜனுக்குக் கருணை மன்னிப்பு வழங்குமாறு, இலங்கை கிரிக்கெட் அணியின் முன்னாள் தலைவரும் முன்னாள் வீரருமான சனத் ஜெயசூரிய சவூதி அரேபியாவிடம் கோரிக்கை விடுத்துள்ளார்.
இது தொடர்பாகத் தனது சமூக வலைத்தளப் பக்கத்தில் பதிவொன்றை வெளியிட்டுள்ள சனத் ஜெயசூரிய, மதம் மற்றும் இன வேறுபாடுகளைக் கடந்து அனைத்து இலங்கையர்களும் இந்த மனிதநேயக் கோரிக்கைக்கு ஆதரவாக ஒன்றிணைந்து நிற்பதாகக் குறிப்பிட்டுள்ளார்.
“இலங்கையர்கள் என்ற வகையில், எமது மதம் அல்லது இனத்தைப் பொருட்படுத்தாமல் நாம் அனைவரும் ஒன்றாக நிற்கிறோம். எமது சக இலங்கையரான சிவராசா அனோஜனுக்கு மனிதநேய அடிப்படையில் கருணை வழங்குமாறு சவூதி அரேபிய இராச்சியத்திடம் தாழ்மையுடன் கேட்டுக்கொள்கிறோம்” என அவர் தனது பதிவில் தெரிவித்துள்ளார்.
மேலும், தனது பதிவில் சவூதி அரேபிய வெளியுறவு அமைச்சர் இளவரசர் பைசல் பின் பர்ஹான் மற்றும் அந்நாட்டின் வெளியுறவு அமைச்சு ஆகியவற்றின் சமூக வலைத்தளக் கணக்குகளையும் அவர் குறிப்பிட்டுள்ளார்.
சனத் ஜெயசூரியவின் இந்த வேண்டுகோள், சிவராசா அனோஜனுக்கு கருணை மன்னிப்பு வழங்கப்பட வேண்டும் என்ற கோரிக்கைக்கு இலங்கையின் விளையாட்டுத் துறையிலிருந்தும் ஆதரவு கிடைத்துள்ளதை வெளிப்படுத்துகிறது.
கல்முனையைச் சேர்ந்த இலங்கைப் புலம்பெயர் தொழிலாளியான சிவராசா அனோஜன், இஸ்லாம் மதத்தை இழிவுபடுத்தும் வகையில் சமூக வலைத்தளத்தில் பதிவிட்டதாகக் குற்றம் சாட்டப்பட்டு சவூதி அரேபியாவில் மரண தண்டனை விதிக்கப்பட்டுள்ளார்.
இந்தத் தண்டனைக்கு எதிராக சவூதி உயர் நீதிமன்றத்தில் மேன்முறையீடு செய்வதற்காக இலங்கை சட்டத்தரணிகள் குழுவினர், சவூதி அரேபிய வழக்கறிஞர்களுடன் இணைந்து பணியாற்றி வருகின்றனர்.
அதேவேளை, சிவராசா அனோஜனுக்குக் கருணை மன்னிப்பு பெற்றுக்கொடுப்பதற்காக இலங்கை அரசாங்கமும் தூதரக ரீதியிலான முயற்சிகளை முன்னெடுத்து வருகின்றமை குறிப்பிடத்தக்கது.
