உலகின் மிக உயரிய திரைப்பட விருதான 99ஆவது அகாடமி விருதுகளுக்கு (ஆஸ்கார்) இலங்கை வரலாற்றில் முதன்முறையாக உத்தியோகபூர்வமாக ‘ரிவர்ஸ்டர்ன்’ திரைப்படம் பரிந்துரைக்கப்பட்டுள்ளது.
இலங்கை சார்பில் ஆஸ்கார் விருதுக்கு பரிந்துரைப்பதற்காக லலித் ரத்நாயக்கவின் ‘ரிவர்ஸ்டர்ன்’, ‘விஹங்க பிரேமய’, ‘ஆயு’, ‘ஃபாதர்’, ‘அந்தோனி’ (தமிழ்) மற்றும் ‘கிரிக்கெட் சாது’ ஆகிய 6 திரைப்படங்கள் விண்ணப்பித்திருந்தன.
எனினும், ஆஸ்கார் சர்வதேச திரைப்படப் பிரிவுக்கான ‘விதி 16, பிரிவு 2C’ இன் படி, ஒரு திரைப்படம் அந்த நாட்டில் திரையரங்குகளில் வணிகரீதியாக திரையிடப்படுவதற்கு முன்பாக தொலைக்காட்சி, வானுார்திகள் , கேபிள் டிவி அல்லது இணையத்தளங்களில் ஒளிபரப்பப்பட்டிருந்தால் அது போட்டியிட தகுதியற்றதாகும்.
அந்தவகையில், சத்ர வீரமன் இயக்கிய ‘ஆயு’ திரைப்படம் இலங்கையில் திரையரங்குகளில் வெளியாவதற்கு முன்பே தென்னாப்பிரிக்க தொலைக்காட்சி மற்றும் வானுார்திகளில் திரையிடப்பட்டமையால் தகுதியிழப்பு செய்யப்பட்டது.
அதேபோன்று, சஞ்சீவ புஷ்பகுமார இயக்கிய ‘விஹங்க பிரேமய’ திரைப்படமும் இலங்கையில் திரையிடப்படுவதற்கு முன்பாக அமெரிக்க அலைவரிசையினூடாக ஐரோப்பிய நாடுகளில் ஒளிபரப்பப்பட்டதால் நிராகரிக்கப்பட்டது.
இதன் காரணமாக, தகுதிபெற்ற எஞ்சிய 4 திரைப்படங்களை மட்டுமே பரிசீலனைக் குழு மதிப்பீடு செய்து, அதில் லலித் ரத்நாயக்க இயக்கிய ‘ரிவர்ஸ்டர்ன்’ திரைப்படத்தை இலங்கையின் அதிகாரப்பூர்வ பரிந்துரையாகத் தேர்வு செய்துள்ளது.
