மத்திய கிழக்கில் நடந்து வரும் மோதல்கள் காரணமாக உலகளாவிய எரிசக்தி விநியோகச் சங்கிலிகளில் ஏற்படும் இடையூறுகள் குறித்த கவலைகளுக்கு மத்தியில் எரிபொருள் விநியோகத்தைப் பெறுவதற்காக இலங்கை ரஷ்யாவுடன் பேச்சுவார்த்தைகளை நடத்த ஆரம்பித்துள்ளது.
இதற்கு அமைவாக, ரஷ்ய எண்ணெய் வாங்குவதற்கான சாத்தியக்கூறுகள் குறித்து விவாதிக்க வெளிவிவகார, வெளிநாட்டு வேலைவாய்ப்பு மற்றும் சுற்றுலாத்துறை அமைச்சர் விஜித ஹேரத் இன்று (13) இலங்கைக்கான ரஷ்ய தூதர் லெவன் எஸ். ஜகார்யனுடன் (Dzhagaryan) வெளிவிவகார அமைச்சில் அவசர சந்திப்பை நடத்தினார்.
இந்த சந்திப்பின் போது, இலங்கையின் தொடர்ச்சியான எரிபொருள் விநியோகத்தைப் பராமரிப்பதற்கான மேலதிக நடவடிக்கையாக ரஷ்ய எரிபொருளைப் பெறுவது குறித்து அமைச்சர் விவாதித்தார்.
இதன்போது, இலங்கையின் கோரிக்கையை உடனடியாக ரஷ்ய அரசாங்கத்திற்குத் தெரிவிக்க தூதர் லெவன் எஸ். ஜகார்யன் ஒப்புக்கொண்டார்.
மேலும், இதற்கான தேவையான ஏற்பாடுகளை எளிதாக்குவதற்கு தொடர்புடைய நிறுவனங்களுடன் ஒருங்கிணைப்பதாகவும் உறுதியளித்தார்.
அத்துடன், தேவைப்படும் போதெல்லாம் இலங்கைக்கு உதவுவதற்கு ரஷ்யா தயாராக இருப்பதாகவும் அவர் குறிப்பிட்டார்.
தொழிலாளர், நிதி மற்றும் பொருளாதார மேம்பாட்டு பிரதி அமைச்சர் அனில் ஜெயந்த, இலங்கை பெற்ரோலியக் கூட்டுத்தாபனத்தின் தலைவர் டி.ஜே. ராஜகருணா, வெளிவிவகார அமைச்சின் செயலாளர்கள் மற்றும் அதிகாரிகள் ஆகியோரும் இந்தக் கலந்துரையாடலில் பங்கெடுத்தனர்.
ஈரான் போரினால் பாதிக்கப்பட்டுள்ள உலகளாவிய எரிசக்தி சந்தைகளை உறுதிப்படுத்துவதற்கான ஒரு படியாக, கடலில் சிக்கித் தவிக்கும் ரஷ்ய எண்ணெய் மற்றும் பெற்றோலியப் பொருட்களை வாங்குவதற்கு அமெரிக்கா நாடுகளுக்கு 30 நாள் உரிமத்தை வழங்கியதன் பின்னணியில் இந்த சந்திப்பு நடந்துள்ளது.
இந்த விதியை விலக்குவது வெளிநாட்டு கப்பல்கள் அமெரிக்க துறைமுகங்களுக்கு இடையில் எரிபொருளை எடுத்துச் செல்ல அனுமதிக்கும், இது செலவுகளைக் குறைக்கும் மற்றும் விநியோகங்களை விரைவுபடுத்தும்.
