ஆழ்ந்த காற்றழுத்தத் தாழ்வு மண்டலம் காரணமாக ஒடிசாவின் கடலோர மற்றும் தெற்குப் பகுதிகளில் செவ்வாய்க்கிழமை பலத்த மழை பெய்துவருவதால் பல்வேறு மாவட்டங்களில் உளள பள்ளிகளுக்கு விடுமுறை விடுக்கப்பட்டுள்ளது.
மோசான வானிலை தொடரும் என வானிலை ஆய்வு மையம் கணித்துள்ள நிலையில், குர்தா, ஜகத்சிங்பூர், கஞ்சம், கஜபதி ஆகிய மாவட்ட நிர்வாகங்கள் அப்பகுதியில் உள்ள பள்ளிகளுக்கு ஒருநாள் விடுமுறை அறிவித்தன. மல்கங்கிரி மாவட்டத்தில் செப்டம்பர் 24 வரை பள்ளிகளுக்கு விடுமுறை அளிக்கப்பட்டுள்ளது.
செப். 22 -ஆம் தேதி நடைபெறவிருந்த தேசிய ஊரகத் திறனாய்வுத் தேர்வு திட்டமிட்டபடி குறிப்பிட்ட தேர்வு மையங்களில் நடைபெறும் என்று அறிவிக்கப்பட்டுள்ளது.
கஞ்சம், கோராபுட் மற்றும் கலாஹண்டி மாவட்ட அதிகாரிகள், ஆசிரியர்கள் தங்கள் பணி இடங்களை விட்டு செப்டம்பர் 25-ஆம் தேதி வரை வெளியேறக்கூடாது. அரசு ஊழியர்களின் விடுப்புகள் ரத்து செய்யப்பட்டுள்ளதாக அதிகாரிகள் தெரிவித்தனர்.
கஞ்சம், கந்தமால் மாவட்டங்களை இணைக்கும் கலிங்கா காட் உள்ளிட்ட சில சாலைகளில் வாகனப் போக்குவரத்தை அரசு கட்டுப்படுத்தியுள்ளது.
