ஸ்காட்லாந்து தேர்தல் முடிவுகள்: 5-வது முறையாக வென்றது SNP !

பிரித்தானியாவின் ஸ்காட்லாந்து நாடாளுமன்றத் (Holyrood) தேர்தல் முடிவுகள் வெளியாகியுள்ளன.

இதில் ஸ்காட்லாந்து தேசியக் கட்சி (SNP) மீண்டும் ஆட்சியைத் தக்கவைத்துள்ளது.

ஸ்காட்லாந்து நாடாளுமன்றத் தேர்தலில் ஸ்காட்லாந்து தேசியக் கட்சி (SNP) தொடர்ந்து ஐந்தாவது முறையாக வெற்றி பெற்று வரலாற்றுச் சாதனை படைத்துள்ளது.

இருப்பினும், தனிப்பெரும் பெரும்பான்மைக்குத் தேவையான இடங்களை அக்கட்சியால் பெற முடியாமல் போயுள்ளது.

ஸ்காட்லாந்து தேசியக் கட்சி ஆட்சியைத் தக்கவைத்த போதிலும், பெரும்பான்மைக்குத் தேவையான 65 இடங்களை விட 7 இடங்கள் குறைவாகப் பெற்று (58 இடங்கள்) சிறுபான்மை அரசாங்கமாகவோ அல்லது கூட்டணி ஆட்சியாகவோ அமைக்க வேண்டிய சூழலில் உள்ளது.

இதேவேளை, ஸ்காட்லாந்தில் ஆட்சியைப் பிடிக்கத் திட்டமிட்டிருந்த தொழிலாளர் கட்சி (Labour), எதிர்பார்த்த வெற்றியைப் பெற முடியாமல் 17 இடங்களுடன் இரண்டாம் இடத்தைப் பகிர்ந்து கொண்டது.

இக்கட்சியுடன் சமபலத்துடன் ரிஃபார்ம் (Reform UK) கட்சியும் 17 இடங்களை வென்று ஸ்காட்லாந்து அரசியலில் பெரும் திருப்புமுனையை ஏற்படுத்தியுள்ளது.

ஸ்காட்லாந்து பசுமைக் கட்சி (Greens) 15 இடங்களை வென்று தனது வரலாற்றிலேயே மிகச்சிறந்த வெற்றியைப் பதிவு செய்துள்ளது.

இதில் முதல்முறையாக நேரடித் தொகுதிகளிலும் அக்கட்சி வெற்றி பெற்றுள்ளமை குறிப்பிடத்தக்கது.

கன்சர்வேடிவ் கட்சி வெறும் 12 இடங்களை மட்டுமே பெற்று, நாடாளுமன்றத்தில் தனது ‘பெரிய எதிர்க்கட்சி’ என்ற அந்தஸ்தை இழந்து வரலாற்றிலேயே மிக மோசமான தோல்வியைச் சந்தித்துள்ளது.

இந்தத் தேர்தல் முடிவுகள் ஸ்காட்லாந்து அரசியலில் ஒரு புதிய அதிகாரப் பகிர்விற்கும், பலமான கூட்டணி பேச்சுவார்த்தைகளுக்கும் வழிவகுத்துள்ளன.