வேலைவாய்ப்பு குறைவு மற்றும் பணவீக்கம்: ஒண்டாரியோ இளைஞர்களின் எதிர்காலத் திட்டங்கள் பாதிப்பு.

ஆண்டுக்கு சுமார் 90,000 டாலர் சம்பளம், 12 மணி நேரக் கடுமையான உழைப்பு, திட்டமிட்ட பட்ஜெட் – இத்தனை இருந்தும் மிரியம் பிராங்கோ (Miriam Franco) போன்ற இளைஞர்களால் ஒரு அங்குலம் கூட முன்னேற முடியவில்லை.

இது வெறும் மிரியத்தின் கதை மட்டுமல்ல; கனடாவின் ஒண்டாரியோ மாகாணத்தில் வசிக்கும் ஆயிரக்கணக்கான இளைஞர்களின் தற்போதைய நிதர்சனம்.

ஒரு காலத்தில் ‘பாதுகாப்பான வேலை’ என்று கருதப்பட்ட நர்சிங் துறையில் இருந்தும் கூட, எதிர்காலம் குறித்த பயம் இவர்களை ஆட்கொண்டுள்ளது.

கனவாகிப் போன வீட்டுக்கனவு

“எனக்கு 26 வயது. டொராண்டோவில் நர்ஸாகப் பணிபுரிகிறேன்.

காகிதத்தில் பார்த்தால் என் வருமானம் சிறப்பாகத் தெரியும்.

ஆனால், நடைமுறையில் நான் அன்றாட வாழ்க்கையைத் தள்ளவே போராட வேண்டியுள்ளது,” என்கிறார் மிரியம். மிசிசாகாவில் (Mississauga) தனது தாய் மற்றும் தம்பியுடன் வசிக்கும் இவர், தனது குடும்பத்தின் பிரதான வருமான ஆதாரம்.

டொராண்டோவின் ஐ.சி.யு (ICU) பிரிவில் 12 மணி நேர ஷிப்டுகளில் வேலை செய்யும் மிரியம், தனது வருமானத்தில் பெரும்பகுதி வரி, காப்பீடு, மளிகைப் பொருட்கள் மற்றும் வீட்டுச் செலவுகளுக்கே சரியாக இருப்பதாகக் கூறுகிறார்.

“மாதத்திற்கு வெறும் 200 டாலர்களை மட்டுமே என்னால் சேமிக்க முடிகிறது.

இந்த வேகத்தில் போனால் ஒண்டாரியோவில் ஒரு வீடு வாங்குவது என்பது எட்டாக்கனி தான்,” என அவர் வேதனையுடன் தெரிவிக்கிறார்.

புள்ளிவிவரங்கள் சொல்லும் கசப்பான உண்மை

Statistics Canada-வின் சமீபத்திய தரவுகளின்படி, கடந்த ஜனவரி மாதத்தில் மட்டும் ஒண்டாரியோவில் 67,000 வேலைவாய்ப்புகள் பறிபோயுள்ளன.

குறிப்பாக 15 முதல் 24 வயதுக்குட்பட்ட இளைஞர்களின் வேலைவாய்ப்புப் பங்கேற்பு விகிதம் கடுமையாகச் சரிந்துள்ளது.

டொராண்டோ மற்றும் அதன் சுற்றுவட்டாரப் பகுதிகளில் (GTA) வசிக்கும் இளைஞர்களிடம் நடத்திய ஆய்வில், நிலையான வேலை இருந்தும் கூட, தங்களால் பொருளாதார ரீதியாக “நிம்மதியாக” இருக்க முடியவில்லை என்ற அச்சம் பரவலாகக் காணப்படுகிறது.

நிபுணர்களின் பார்வை: ‘ஒப்பீடு கலாச்சாரம்’ ஒரு சாபமா?

நிதி ஆலோசகரும் எழுத்தாளருமான ஜெசிகா மூர்ஹவுஸ் (Jessica Moorhouse) இது குறித்துக் கூறும்போது, “26 வயதில் 90,000 டாலர் ஈட்டுவது பெரிய விஷயம் தான்.

ஆனால், இன்றைய சமூக வலைதளங்கள் காட்டும் ஆடம்பர வாழ்க்கையோடு ஒப்பிட்டுப் பார்த்து, இளைஞர்கள் தங்களைத்தாங்களே தாழ்வாக நினைக்கிறார்கள்” என்கிறார்.

இருப்பினும், இன்றைய இளைஞர்கள் தங்களின் 20-களிலேயே நிதி மேலாண்மை குறித்து கவலைப்பட வேண்டிய கட்டாயத்திற்குத் தள்ளப்பட்டுள்ளதை அவர் ஒப்புக்கொள்கிறார்.

மற்றொரு நிபுணரான சீன் கூப்பர் (Sean Cooper) கூறுகையில், “வருமான உயர்வுக்கும் வீடுகளின் விலை உயர்வுக்கும் இடையே மிகப்பெரிய இடைவெளி உள்ளது.

இதுவே அனைத்துப் பிரச்சனைகளுக்கும் ஆணிவேர்” என்கிறார்.

ஏஐ (AI) மாற்றமும் இளைஞர்களின் போராட்டமும்

ஸ்கார்பாரோவைச் சேர்ந்த 24 வயது ஷரண் குமார் (Sharran Kumar), செயற்கை நுண்ணறிவு (Artificial Intelligence) தொழில்நுட்பத்தின் வளர்ச்சியால் தனது கன்சல்டிங் வேலையை இழந்தவர்.

“வாரம் தோறும் நிராகரிப்பு மின்னஞ்சல்களைப் பார்ப்பது மனச்சோர்வைத் தருகிறது,” என்கிறார் அவர்.

வேலையில்லாத நிலையிலும், தனது பொருளாதாரச் சிக்கல்களைச் சமாளிக்க ‘BudgetCaddie’ எனும் புதிய செயலியை அவர் உருவாக்கி வருகிறார்.

“நாங்கள் உழைக்கத் தயார், ஆனால் இந்தச் சூழலைச் சமாளிக்க அரசு மற்றும் அமைப்புகளின் உதவி இளைஞர்களுக்குத் தேவை,” என அவர் கோரிக்கை விடுக்கிறார்.