வங்கதேச ஆடைத் துறைக்கு கடும் நெருக்கடி! காரணம் என்ன?

உலகின் மிகப்பெரிய பொருளாதாரக் கூட்டமைப்பான ஐரோப்பிய ஒன்றியத்துடன் (European Union) இந்தியா வரலாற்றுச் சிறப்புமிக்க சுதந்திர வர்த்தக ஒப்பந்தத்தை (FTA) எட்டியுள்ளது.

2026, ஜனவரி 27 அன்று புதுடெல்லியில் நடைபெற்ற 16-வது இந்தியா-ஐரோப்பிய ஒன்றிய உச்சிமாநாட்டில் இந்த அறிவிப்பு வெளியானது.

இந்த “மெகா ஒப்பந்தம்” இந்தியாவின் ஆடை மற்றும் ஜவுளித் துறைக்கு ஐரோப்பிய சந்தையில் வரி இல்லாத நேரடி நுழைவை (Zero-duty access) வழங்குகிறது.

இது வங்கதேசத்தின் நீண்டகால ஆதிக்கத்திற்கு மிகப்பெரிய சவாலாக அமையும் எனப் பொருளாதார நிபுணர்கள் எச்சரிக்கின்றனர்.

மாறும் வர்த்தக சமன்பாடுகள்

தற்போது வரை, வங்கதேசம் ஒரு குறைந்த வளர்ச்சியடைந்த நாடு (LDC) என்ற அடிப்படையில் ஐரோப்பிய ஒன்றியத்திற்கு வரி ஏதுமின்றி ஆடைகளை ஏற்றுமதி செய்து வந்தது.

ஆனால், இந்தியா 9% முதல் 12% வரையிலான சுங்க வரியைச் செலுத்தி வந்தது. 2027-ஆம் ஆண்டு முதல் அமலுக்கு வரவுள்ள இந்த புதிய ஒப்பந்தத்தின் மூலம், இந்தியாவுக்கான இந்த வரித் தடை முழுமையாக நீக்கப்படுகிறது.

இதனால், தரமான ஆடைகளைச் மலிவான விலையில் வழங்க இந்தியாவிற்கு வாய்ப்பு கிடைப்பதால், ஐரோப்பிய கொள்முதல் நிறுவனங்கள் வங்கதேசத்தை விட்டு இந்தியாவை நோக்கி நகரத் தொடங்கும் என எதிர்பார்க்கப்படுகிறது.

வங்கதேசத்தின் நிலை: 2029-க்குப் பிறகு என்ன நடக்கும்?

வங்கதேசத்தின் மொத்த ஏற்றுமதியில் 50 சதவீதத்திற்கும் அதிகமானவை (சுமார் 19.71 பில்லியன் டாலர்) ஐரோப்பிய நாடுகளுக்கே செல்கின்றன. வரும் நவம்பர் மாதம் வங்கதேசம் LDC அந்தஸ்திலிருந்து வெளியேறத் திட்டமிட்டுள்ளது. அதன்பிறகு மூன்று ஆண்டுகளுக்கு மட்டுமே சலுகைகள் நீடிக்கும்.

2029-ஆம் ஆண்டுக்குள் வங்கதேசம் “GSP Plus” அல்லது ஐரோப்பிய ஒன்றியத்துடன் ஒரு நேரடி வர்த்தக ஒப்பந்தத்தைச் செய்யத் தவறினால், அந்நாட்டு ஆடைகளுக்கு 12.5% வரி விதிக்கப்படும். அதே நேரத்தில் இந்தியா 0% வரியுடன் சந்தையில் இருக்கும். இந்த 12% க்கும் அதிகமான விலை வித்தியாசம் வங்கதேசத்தின் ஏற்றுமதியைப் படுகுழியில் தள்ளக்கூடும் என ‘Centre for Policy Dialogue’ (CPD) அமைப்பின் ஆய்வாளர் முஸ்தாபிசுர் ரஹ்மான் கவலை தெரிவித்துள்ளார்.

இந்தியாவின் பலமும் வங்கதேசத்தின் பலவீனமும்

இந்தியாவின் ஆடைத் துறையானது வங்கதேசத்தை விட அதிகப் பலம் வாய்ந்தது என ‘BGMEA’ இயக்குனர் பைசல் சமத் குறிப்பிட்டுள்ளார்.

• மூலப்பொருட்கள்: இந்தியா பருத்தி உற்பத்தியில் முன்னணியில் உள்ளது. ஆனால் வங்கதேசம் நூல் மற்றும் துணிகளுக்கு இந்தியாவையே சார்ந்துள்ளது.

• உற்பத்தித் திறன்: இந்தியாவில் ஸ்பின்னிங் முதல் ஆடை தயாரிப்பு வரை அனைத்தும் உள்நாட்டிலேயே ஒருங்கிணைக்கப்பட்டுள்ளதால் (Backward Linkage), செலவு குறைகிறது.

• அரசு ஆதரவு: இந்திய அரசின் ‘PM MITRA’ போன்ற மெகா ஜவுளிப் பூங்காத் திட்டங்கள் உற்பத்தித் திறனைப் பன்மடங்கு அதிகரித்துள்ளன.

எச்சரிக்கை மணி: வங்கதேசத்திற்கு விடுக்கப்பட்ட அழைப்பு

இந்த ஒப்பந்தத்தை ஒரு “எச்சரிக்கை மணி” (Wake-up call) என்று வங்கதேச வர்த்தகத் தலைவர்கள் வர்ணித்துள்ளனர். அமெரிக்காவின் வர்த்தகக் கொள்கை மாற்றங்களால் உலகெங்கிலும் உள்ள ஏற்றுமதியாளர்கள் இப்போது ஐரோப்பிய சந்தையை நோக்கித் திரும்புகின்றனர். இத்தகைய சூழலில், வங்கதேசம் உடனடியாக ஐரோப்பிய ஒன்றியத்துடன் தூதரக ரீதியான பேச்சுவார்த்தைகளை நடத்தி, வரிச் சலுகைகளை உறுதி செய்யாவிட்டால், அந்நாட்டின் பொருளாதார முதுகெலும்பாக விளங்கும் ஆடைத் துறை பெரும் வீழ்ச்சியைச் சந்திக்கும்.