நாடாளுமன்றத்தில் நேற்று இடம்பெற்ற கல்வி மறுசீரமைப்பு குறித்த ஒத்திவைப்பு வேளை விவாதத்தின் போது, ஆளுங்கட்சி மற்றும் எதிர்க்கட்சி உறுப்பினர்களுக்கு இடையே பாலியல் நடத்தைகள் குறித்த கடுமையான வார்த்தை மோதல்கள் இடம்பெற்றன.
எதிர்க்கட்சியின் குற்றச்சாட்டு
எதிர்க்கட்சி உறுப்பினர் சுஜீவ சேனசிங்க தனது உரையின் போது, தற்போதைய NPP அரசாங்கத்தைச் சார்ந்த சிலர் ஒரு குறிப்பிட்ட வாழ்க்கை முறையைக் கடைப்பிடிப்பதாகக் குற்றம் சாட்டினார். “அரசாங்கத்தைச் சூழவுள்ள சிலர் ஓரினச்சேர்க்கை போன்ற நடத்தைகளைக் கொண்டிருப்பதாக நான் கருதுகிறேன். இது குறித்து சபாநாயகர் ஜகத் விக்ரமரத்ன நன்கு அறிவார்,” என அவர் தெரிவித்தார். மேலும், இவ்வாறான வாழ்க்கை முறைகளை பாடசாலை மாணவர்கள் பின்பற்ற ஊக்குவிக்கக் கூடாது என்றும் அவர் வலியுறுத்தினார்.
அரச தரப்பின் பதிலடி
இதற்குப் பதிலளித்த ஆளுங்கட்சித் தரப்பு முதற்கோலாளர் நலிந்த ஜயதிஸ்ஸ, எதிர்க்கட்சித் தலைவரும் ஏனைய உறுப்பினர்களும் ஆறாம் தரப் பாடப்புத்தகத்தைக் கண்டு ஏன் இவ்வளவு அச்சப்படுகிறார்கள் எனக் கேள்வி எழுப்பினார்.
“பாடப்புத்தகத்தில் இரண்டு சிறுவர்கள் இருக்கும் படம் ஒற்றுமையையே (Teamwork) குறிக்கிறது. ஆனால் எதிர்க்கட்சியினர் அதனை ஓரினச்சேர்க்கையாகப் பார்க்கிறார்கள். அதேபோல், வானவில் படத்தைப் பார்த்துவிட்டு அது LGBTQ கொடியைக் குறிப்பதாகக் கூறுகிறார்கள். வானவில்லைப் பார்த்தால் இவர்களுக்குப் பாலியல் எண்ணங்கள் தோன்றுகிறதா?” என அவர் கடுமையாகச் சாடினார்.
கல்வி மறுசீரமைப்பில் சர்ச்சை
எதிர்க்கட்சியினர் புதிய உலகிற்குள் நுழைய முற்படும் ஆறாம் தர மாணவர்களைத் தடுப்பதாகத் தெரிவித்த நலிந்த ஜயதிஸ்ஸ, இவ்வாறான குறுகிய எண்ணங்கள் கல்வித் துறையின் வளர்ச்சிக்குப் பாதிப்பை ஏற்படுத்தும் எனவும் சுட்டிக்காட்டினார். நாடாளுமன்றத்தில் இவ்வாறான பாலியல் ரீதியான தனிநபர் தாக்குதல்கள் மற்றும் தர்க்கங்கள் இடம்பெற்றமை பெரும் விவாதத்தை ஏற்படுத்தியுள்ளது.
