கனடாவின் ஹமில்டனில் அமைந்துள்ள ஸ்டெல்கோ (Stelco) உருக்காலை நிறுவனத்தில் தற்காலிகமாகப் பணிநீக்கம் செய்யப்பட்ட 175 ஊழியர்களை மீண்டும் பணியில் இணைப்பது தொடர்பில், கனேடிய தொழில்துறை அமைச்சர் மெலானி ஜோலியுடன் கலந்துரையாடுவதற்கு கிளீவ்லேண்ட்-கிளிஃப்ஸ் நிறுவனம் கோரிக்கை விடுத்துள்ளது.
அமெரிக்காவின் ஒஹியோ மாநிலத்தைத் தலைமையகமாகக் கொண்ட இந்நிறுவனம், 2024ஆம் ஆண்டு ஸ்டெல்கோ நிறுவனத்தைக் கையகப்படுத்தியபோது கனேடிய அரசாங்கத்துக்கு வழங்கிய 34 உறுதிமொழிகளையும் முழுமையாக நிறைவேற்றியுள்ளதாகத் தெரிவித்துள்ளது.
கனடாவின் முதலீட்டுச் சட்டத்தின் கீழ் தமக்குள்ள கடப்பாடுகள் குறித்து விரிவான ஆய்வை மேற்கொண்ட பின்னரே இந்த அறிவிப்பை வெளியிட்டுள்ளதாக நிறுவனம் குறிப்பிட்டுள்ளது.
மேலும், ஹமில்டனில் தற்காலிகமாகப் பணிநீக்கம் செய்யப்பட்டுள்ள 175 ஊழியர்களையும் மீண்டும் முழுமையாகப் பணியில் இணைப்பதற்கான வழிமுறைகள் குறித்து விவாதிக்க, நிறுவனத்தின் தலைவர் மற்றும் தலைமை நிர்வாக அதிகாரி லோரென்சோ கோன்சால்வெஸுடன் இணைந்து சந்திப்பொன்றை நடத்துவதற்கு அமைச்சர் மெலானி ஜோலியிடம் கோரிக்கை விடுக்கப்பட்டுள்ளதாகவும் தெரிவிக்கப்பட்டுள்ளது.
எனினும், இந்தக் கோரிக்கைக்கு அமைச்சர் இதுவரை பதிலளிக்கவில்லை என நிறுவனம் கூறியுள்ளது.
இதற்கிடையில், ஸ்டெல்கோ நிறுவனத்தின் பணிநீக்கத் திட்டத்தைத் திரும்பப் பெறுமாறு கனேடிய அரசாங்கம் ஏற்கனவே உத்தரவிட்டுள்ளது. கடந்த மாத இறுதியில், ஹமில்டன் உருக்காலையில் சில உற்பத்தி நடவடிக்கைகளை நிறுத்துவதன் காரணமாக 500 ஊழியர்கள் வரை பணிநீக்கம் செய்யப்படலாம் என நிறுவனம் அறிவித்திருந்தது.
அமெரிக்காவால் கனேடிய உருக்குத் துறைக்கு விதிக்கப்பட்டுள்ள 50 சதவீதம் வரையிலான இறக்குமதி வரிகளே இதற்குக் காரணம் என நிறுவனம் சுட்டிக்காட்டியுள்ளது.
ஆனால், இந்தக் காரணத்தை நிராகரித்துள்ள அமைச்சர் மெலானி ஜோலி, கனேடிய அரசாங்கத்துக்கு வழங்கிய உறுதிமொழிகளை நிறுவனம் கட்டாயம் நிறைவேற்ற வேண்டும் என வலியுறுத்தியுள்ளார். சந்தை நிலைமைகளில் ஏற்படும் மாற்றங்கள் அந்தக் கடப்பாடுகளிலிருந்து நிறுவனத்துக்கு விலக்களிக்காது என்றும் அவர் தெரிவித்துள்ளார்.
அத்துடன், அமெரிக்க மற்றும் கனேடிய உருக்குத் தொழில்துறைகளுக்கு நன்மையளிக்கும் கொள்கைகளை ஆதரிப்பதாக நிறுவனம் வழங்கிய உறுதிமொழிக்கு முரணாக, கனேடிய உருக்கு மீதான அமெரிக்க வரிகளை கோன்சால்வெஸ் பகிரங்கமாக ஆதரித்துள்ளதாகவும் அமைச்சர் தனது கடிதத்தில் சுட்டிக்காட்டியுள்ளார்.
மறுபுறம், ஸ்டெல்கோ நிறுவனத்தைக் கையகப்படுத்திய பின்னர், நடப்பாண்டின் மூன்றாவது காலாண்டே நிறுவனத்தின் சிறந்த காலாண்டாக அமைந்ததாக கோன்சால்வெஸ் கடந்த ஒக்டோபர் 19ஆம் திகதி தெரிவித்திருந்தார். கனடாவின் சூடேற்றப்பட்ட உருட்டப்பட்ட உருக்கு சந்தையும் கணிசமாக மேம்பட்டுள்ளதாக அவர் குறிப்பிட்டிருந்தார்.
இந்நிலையில், பணிநீக்க விவகாரம் தொடர்பில் இரு தரப்பினருக்கும் இடையே பல வாரங்களாகக் கடிதப் பரிமாற்றங்கள் இடம்பெற்று வருகின்றன. அரசாங்கம் வழங்கிய காலக்கெடுவுக்குள் தீர்வு எட்டப்படாவிட்டால், இந்த விவகாரம் நீதிமன்றத்துக்குச் செல்லும் சாத்தியக்கூறுகள் காணப்படுகின்றன.
 உருக்காலை நிறுவனத்தில் தற்காலிகமாகப் பணிநீக்கம் செய்யப்பட்ட 175){kind=link}