டொராண்டோ நகரின் சுரங்கப்பாதை ரயில் நிலையங்களில் மூன்று நபர்களிடம் ஆபாச முறையில் அத்துமீறி நடந்து கொண்ட குற்றச்சாட்டின் பேரில் இருபத்தெட்டு வயதான அடேபாயோ மாவோலி என்ற நபர் கைது செய்யப்பட்டுள்ளார்.
முதல் சம்பவம் கடந்த செப்டம்பர் ஒன்றாம் தேதி பிற்பகல் மூன்று மணியளவில் கிங் நிலையத்தை நோக்கி சென்ற தெற்கு திசை ரயிலில் நிகழ்ந்தது. அங்கு ரயிலில் பயணித்த இரண்டு நபர்களிடம் அநாகரிகமாக நடந்துகொண்ட அந்த நபர், பயணிகள் பாதுகாப்பு எச்சரிக்கை மணியை இயக்கியதும் அங்கிருந்து தப்பிச் சென்றார்.
இதனைத் தொடர்ந்து, அக்டோபர் மூன்றாம் தேதி அதிகாலை பன்னிரண்டு மணி பத்து நிமிட அளவில் காலேஜ் ரயில் நிலையத்தில் இறங்கிய மற்றொரு பயணியை பின் தொடர்ந்து மின் படிக்கட்டில் வைத்து அத்துமீறலில் ஈடுபட்டுள்ளார். பாதிக்கப்பட்ட நபர் சத்தமிட்டதைத் தொடர்ந்து அவர் அங்கிருந்து தப்பியோடினார். இது தொடர்பாக தீவிர விசாரணை மேற்கொண்ட டொராண்டோ காவல்துறை, அடேபாயோ மாவோலி மீது ஒரு பாலியல் அத்துமீறல் மற்றும் இரண்டு அநாகரிக நடத்தை பிரிவுகளின் கீழ் வழக்குப் பதிவு செய்து கைது செய்தது.
அவர் அக்டோபர் ஒன்பதாம் தேதி பிணை விசாரணைக்காக நீதிமன்றத்தில் ஆஜர்படுத்தப்பட்டார். மேலும் இந்த சம்பவத்தில் பிற நபர்களும் பாதிக்கப்பட்டிருக்கக்கூடும் என காவல்துறையினர் கருதுவதால், பொதுமக்கள் தகவல் தெரிவிக்குமாறு கேட்டுக்கொள்ளப்பட்டுள்ளனர்.
