கனடாவின் நோவா ஸ்கோஷியா மாகாணத்திலுள்ள கென்ட்வில் பகுதியில், தனது பிணை நிபந்தனைகளை மீறி நடந்துகொண்ட குற்றத்திற்காக ஆபத்தான பாலியல் குற்றவாளி ஒருவர் கைது செய்யப்பட்டுள்ளார்.
சனிக்கிழமை இரவு 43 வயதான மேத்யூ வில்லியம் ரோஜின்ஸ் என்பவரைக் கைது செய்ததாக கென்ட்வில் காவல் துறையினர் தெரிவித்துள்ளனர். ரோஜின்ஸ் பல மாகாணங்களில் குற்றப் பின்னணி கொண்ட தண்டனை பெற்ற குற்றவாளி ஆவார்.
வன்கொடுமை, இரவில் அத்துமீறி நுழைதல், ஆபாசமான செயல்களில் ஈடுபடுதல், தாக்குதல் மற்றும் குற்றவியல் ரீதியிலான துன்புறுத்தல் உள்ளிட்ட பல குற்றச்சாட்டுகளில் இவர் ஏற்கனவே குற்றவாளியாக நிரூபிக்கப்பட்டுள்ளார்.
முன்னதாக, புதன்கிழமை அன்று ரோஜின்ஸ் ட்ரூரோ பகுதியில் வசித்து வந்ததாகத் தகவல்கள் வெளியாகியிருந்தன. ஆனால், வியாழக்கிழமை அவர் அந்தப் பகுதியில் இல்லை எனத் தெரிவித்த காவல் துறையினர், வெள்ளிக்கிழமை அவர் கென்ட்வில் சமூகப் பகுதியில் வசித்து வருவதாகத் தெளிவுபடுத்தினர்.
ரோஜின்ஸ் சிறையிலிருந்து விடுவிக்கப்பட்ட போது, அவர் மீது பல்வேறு கடுமையான கட்டுப்பாடுகள் விதிக்கப்பட்டிருந்தன.
16 வயதிற்குட்பட்ட குழந்தைகள் அல்லது சிறுவர், சிறுமிகள் அருகில் இருக்கக்கூடாது, பொதுப் பூங்காக்கள், பொது நீச்சல் குளங்கள், பகல்நேர பராமரிப்பு மையங்கள், சமூக மையங்கள், பள்ளி வளாகங்கள், விளையாட்டு மைதானங்கள் அல்லது சிறுவர்கள் கூடும் வாய்ப்புள்ள எந்தவொரு இடத்திற்கும் அவர் செல்லக்கூடாது, 16 வயதிற்குட்பட்ட நபர்கள் மீது அதிகாரம் செலுத்தும் வகையிலோ அல்லது அவர்களின் நம்பிக்கையைப் பெறும் வகையிலோ உள்ள ஊதியம் பெறும் அல்லது தன்னார்வப் பணிகளில் அவர் ஈடுபடக்கூடாது என நிபந்தனை விதிக்கப்பட்டிருந்தது.
நீதிமன்றத்தின் அனுமதி பெறாமல் 16 வயதிற்குட்பட்ட எவருடனும் எவ்வித தொடர்பும் வைத்திருக்கக்கூடாது எனவும் துப்பாக்கிகள் அல்லது வெடிமருந்துகளை வைத்திருக்க அவருக்குத் தடை விதிக்கப்பட்டுள்ளது. தற்போது காவலில் வைக்கப்பட்டுள்ள ரோஜின்ஸ், இன்று நீதிமன்றத்தில் ஆஜர்படுத்தப்பட உள்ளார்.
