கடுமையான புயல் மற்றும் இயற்கை பேரிடர் அச்சுறுத்தல் காரணமாக, அமெரிக்கா மற்றும் மெக்சிகோ நாடுகளுக்குச் செல்லும் பயணிகளுக்கு கனடா அரசு அவசர பயண ஆலோசனைக் குறிப்பை வெளியிட்டுள்ளது. விடுமுறைக் காலங்களில் அதிகம் பார்வையிடப்படும் இந்த பகுதிகளில் கனமழை, சூறாவளிக் காற்று மற்றும் உயிருக்கு ஆபத்தான வானிலை நிலவக்கூடும் என்பதால் இந்நடவடிக்கை எடுக்கப்பட்டுள்ளது.
மெக்சிகோவின் தென்மேற்கு கடலோரப் பகுதிகளை ‘சைமன்’ வெப்பமண்டல புயல் நெருங்கி வருகிறது. இது மிக ஆபத்தான நான்காம் நிலை சூறாவளியாக உருவெடுக்க வாய்ப்புள்ளதாக அமெரிக்க தேசிய சூறாவளி மையம் தெரிவித்துள்ளது. இதன் காரணமாக மணிக்கு நூறு கிலோமீட்டர் வேகத்தில் பலத்த காற்று வீசுவதுடன், மிகக் கடுமையான மழை, திடீர் வெள்ளப்பெருக்கு மற்றும் நிலச்சரிவு ஏற்படக்கூடும் என எச்சரிக்கப்பட்டுள்ளது. இதனால் அப்பகுதிகளில் போக்குவரத்து, மின்சாரம் மற்றும் குடிநீர் விநியோகம் போன்ற அத்தியாவசிய சேவைகள் பாதிக்கப்படலாம்.
