பல தசாப்தங்களுக்குப் பிறகு, கொழும்பு புறக்கோட்டை மத்திய பேருந்து நிலையத்தை புதுப்பிக்கும் பணிகளுக்கான ஏற்பாடுகள் மேற்கொள்ளப்பட்டுள்ளன. கடந்த 60 ஆண்டுகளில் முதல் முறையாக இந்த நிலையம் முழுமையாக புதுப்பிக்கப்படவுள்ளது.
புதுப்பிப்பு பணிகளுக்கான மதிப்பிடப்பட்ட செலவு 424 மில்லியன் ரூபாய் என நிர்ணயிக்கப்பட்டுள்ளது. 1964 ஆம் ஆண்டு கட்டப்பட்ட இந்த மத்திய பேருந்து நிலையம், தற்போது தினமும் 1,500க்கும் மேற்பட்ட பேருந்து வழித்தடங்களையும், ஆயிரக்கணக்கான பயணிகளையும் சேவை செய்கிறது.
ஆனால் பல தசாப்தங்களாக பராமரிப்பு இல்லாமல் பழுதடைந்த நிலையில் இருந்ததால், அரசு நாட்டின் 50 பேருந்து நிலையங்களை நவீனமயமாக்கும் திட்டத்தை தொடங்கியுள்ளது.
இதன் ஒரு பகுதியாக, புறக்கோட்டை மத்திய பேருந்து நிலையத்தின் நவீனமயமாக்கல் பணிகள் வரும் செப்டம்பர் 15ஆம் திகதி ஜனாதிபதி அநுரகுமார திசாநாயக்கவின் தலைமையில் ஆரம்பிக்கப்படவுள்ளது.
விமானப்படை தொழில்நுட்பத்தைப் பயன்படுத்தி நிலையம் புதுப்பிக்கப்படுவது குறிப்பிடத்தக்க அம்சமாகும். புதிய திட்டத்தின் கீழ் கழிப்பறைகள், தகவல் மையங்கள் மற்றும் மேம்படுத்தப்பட்ட பாதுகாப்பு அமைப்புகள் நிறுவப்படவுள்ளன.
புதுப்பிப்பு பணிகளுக்காக நிலையத்தில் பேருந்து சேவைகள் தற்காலிகமாக நிறுத்தப்பட்டுள்ளன. மேலும், நிலைய வளாகத்தில் இருந்த கடைகள் பணிகளுக்காக அகற்றப்பட்டுள்ளன.
