ரூபிள் நாகி: உலகத்தரம் வாய்ந்த ஆசிரியர் விருதை வென்ற இந்தியர்!

துபாயில் நடைபெற்ற உலக அரசாங்க உச்சிமாநாட்டில் (World Government Summit), இந்தியாவின் ரூபிள் நாகி (Rouble Nagi) 2026-ஆம் ஆண்டின் ‘குளோபல் டீச்சர் பிரைஸ்’ (Global Teacher Prize) விருதை வென்று வரலாற்றுச் சாதனை படைத்துள்ளார்.

சுமார் 1 மில்லியன் டாலர் (சுமார் ₹8.3 கோடி) பரிசுத் தொகையைக் கொண்ட இந்த உயரிய விருது, கல்வித் துறையில் புரட்சிகரமான மாற்றங்களை ஏற்படுத்தியதற்காக அவருக்கு வழங்கப்பட்டுள்ளது.

துபாய் இளவரசரால் வழங்கப்பட்ட கௌரவம்

‘ஜிஇஎம்எஸ் எஜுகேஷன்’ (GEMS Education) அமைப்பால் பத்தாவது ஆண்டாக வழங்கப்படும் இந்த விருதை, துபாய் இளவரசர் ஷேக் ஹம்தான் பின் முகமது பின் ரஷித் அல் மக்தூம் அவர்கள் ரூபிள் நாகிக்கு வழங்கி கௌரவித்தார்.

யுனெஸ்கோ (UNESCO) மற்றும் வர்க்கி அறக்கட்டளையுடன் (Varkey Foundation) இணைந்து நடத்தப்படும் இந்த விருது, உலகின் 139 நாடுகளிலிருந்து வந்த 5,000-க்கும் மேற்பட்ட விண்ணப்பங்களிலிருந்து ஒருவரைத் தேர்வு செய்து வழங்கப்படுகிறது.

கலையை கல்வியாக மாற்றிய ‘வாழும் சுவர்கள்’

ரூபிள் நாகியின் வெற்றிக்கு மிகமுக்கியக் காரணமாக அமைந்தது அவரது விசித்திரமான கற்பித்தல் முறை.

கைவிடப்பட்ட மற்றும் பாழடைந்த சுவர்களைக் கல்வி போதிக்கும் ‘வாழும் சுவர்களாக’ (Living walls of learning) அவர் மாற்றினார்.

இந்தச் சுவர்களில் வரையப்படும் ஊடாடும் சித்திரங்கள் (Interactive murals) மூலம் குழந்தைகளுக்கு வாசிப்பு, எழுத்து மற்றும் கணிதம் ஆகிய அடிப்படைத் திறன்களோடு, பொது சுகாதாரம் மற்றும் சுற்றுச்சூழல் விழிப்புணர்வையும் அவர் போதித்தார்.

கடந்த 20 ஆண்டுகளில், சுமார் 10 மில்லியனுக்கும் அதிகமான குழந்தைகளை முறையான கல்வி நீரோட்டத்தில் இணைக்க இவரது கலை சார்ந்த கற்பித்தல் முறை உதவியுள்ளது.

ரூபிள் நாகி அறக்கட்டளையின் அசுர வளர்ச்சி

தமது ‘ரூபிள் நாகி ஆர்ட் பவுண்டேஷன்’ (Rouble Nagi Art Foundation) மூலம் இந்தியா முழுவதும் 800-க்கும் மேற்பட்ட கல்வி மையங்களை அவர் நிறுவியுள்ளார். குறிப்பாக:

• குறைந்த வருமானம் கொண்ட பகுதிகள்: இந்தியா முழுவதும் 100-க்கும் மேற்பட்ட பின்தங்கிய கிராமங்கள் மற்றும் குடிசைப் பகுதிகளில் பாதுகாப்பான கல்விச் சூழலை உருவாக்கியுள்ளார்.

• பள்ளி இடைநிற்றல் குறைப்பு: இவரது முயற்சியால் பள்ளிகளில் இருந்து பாதியிலேயே விலகும் மாணவர்களின் எண்ணிக்கை 50 சதவீதத்திற்கும் மேலாகக் குறைந்துள்ளது.

• ஆசிரியர் பயிற்சி: சுமார் 600-க்கும் மேற்பட்ட ஆசிரியர்கள் மற்றும் தன்னார்வலர்களுக்குப் பயிற்சி அளித்து, இந்தத் திட்டத்தை ஒரு நிலையான கல்வி மாதிரியாக மாற்றியுள்ளார்.

பரிசுத் தொகையும் எதிர்காலக் கனவும்

தனக்குக் கிடைத்துள்ள 1 மில்லியன் டாலர் பரிசுத் தொகையைத் தனது தனிப்பட்டத் தேவைக்காகப் பயன்படுத்தாமல், ஒரு தொழிற்பயிற்சி நிறுவனத்தைத் (Vocational Institute) தொடங்கப் போவதாக ரூபிள் நாகி அறிவித்துள்ளார்.

இந்த நிறுவனத்தின் மூலம் பின்தங்கிய நிலையில் உள்ள மில்லியன் கணக்கான இளைஞர்களுக்கு டிஜிட்டல் தொழில்நுட்பம் மற்றும் பல்வேறு தொழிற்பயிற்சிகளை இலவசமாக வழங்க அவர் திட்டமிட்டுள்ளார்.

இதன் மூலம் வறுமைக் கோட்டிற்கு கீழ் உள்ள இளைஞர்களின் வாழ்வாதாரத்தை உயர்த்துவதே தனது இலக்கு என அவர் நெகிழ்ச்சியுடன் தெரிவித்தார்.