மாணவர் புரட்சிக்குப் பிந்தைய முதல் தேர்தல்: வங்கதேச அரசியல் களம் ஒரு பார்வை.

சுமார் 15 ஆண்டுகால ஷேக் ஹசீனாவின் (Sheikh Hasina) அதிகாரத்துவ ஆட்சி வீழ்த்தப்பட்ட பிறகு, வங்கதேசம் தனது மிக முக்கியமான பொதுத் தேர்தலை இன்று (பிப்ரவரி 12, 2026) எதிர்கொள்கிறது.

2024-ல் நடந்த மாணவர் போராட்டத்தின் போது சுமார் 1,400 பேர் கொல்லப்பட்ட கொடூரமான அடக்குமுறைக்குப் பின், ஹசீனா பதவியிலிருந்து அகற்றப்பட்டு இந்தியாவுக்குத் தப்பிச் சென்றார்.

அந்த ரத்தக் கறை படிந்த பக்கங்களைக் கடந்து, ஒரு புதிய ஜனநாயக விடியலை நோக்கி வங்கதேச மக்கள் இன்று வாக்குச்சாவடிகளுக்கு விரைகின்றனர்.

தேர்தல் களம்: எப்போது? எப்படி?

வங்கதேசத் தேர்தல் ஆணையத்தின் (ECB) அறிவிப்பின்படி, இன்று காலை 7:30 மணிக்குத் தொடங்கிய வாக்குப்பதிவு மாலை 4:30 மணி வரை நடைபெறுகிறது.

• வாக்காளர்கள்: 12.7 கோடிக்கும் அதிகமானோர் (127,711,793).

• வாக்குச்சாவடிகள்: 64 மாவட்டங்களில் உள்ள 42,761 மையங்கள்.

• தொகுதிகள்: 300 நேரடிப் நாடாளுமன்றத் தொகுதிகள் (மீதமுள்ள 50 இடங்கள் பெண்களுக்கு விகிதாச்சார அடிப்படையில் ஒதுக்கப்படும்).

இந்தத் தேர்தலின் சிறப்பம்சமாக, வங்கதேச வரலாற்றிலேயே முதல்முறையாக சுமார் 1.5 கோடி புலம்பெயர்ந்த தொழிலாளர்களுக்காக தபால் வாக்கு (Postal Ballot) வசதி செய்யப்பட்டுள்ளது.

நாட்டின் பொருளாதாரத் தூண்களாகத் திகழும் இவர்களின் பங்களிப்பு இம்முறை முடிவுகளைத் தீர்மானிப்பதில் முக்கியப் பங்கு வகிக்கும்.

“ஜூலை சாசனம்”: இரட்டை வாக்குப்பதிவு

இம்முறை வாக்காளர்கள் இருமுறை வாக்களிக்க வேண்டும்.

ஒன்று நாடாளுமன்ற உறுப்பினரைத் தேர்ந்தெடுக்க, மற்றொன்று ‘ஜூலை தேசிய சாசனம் 2025’ தொடர்பான பொது வாக்கெடுப்பு (Referendum).

மாணவர் புரட்சிக்குப் பின் உருவாக்கப்பட்ட இந்த சாசனம், எதிர்கால வங்கதேசத்தின் அரசியல் சாசனத் திருத்தங்கள் மற்றும் சட்ட மாற்றங்களுக்கான வரைபடமாகும்.

“இந்தத் தேர்தல் முடிவுகளைத் தாண்டி, வங்கதேசத்தின் அரசியல் பயணத்தில் இது ஒரு ஆழமான தாக்கத்தை ஏற்படுத்தும்,” என்கிறார் வங்கதேச சுதந்திர பல்கலைக்கழக விரிவுரையாளர் கண்டகர் தஹ்மித் ரெஜ்வான்.

களத்தில் நிற்கும் முக்கிய சக்திகள்

ஹசீனாவின் ‘அவாமி லீக்’ (Awami League) கட்சிக்குத் தடை விதிக்கப்பட்டுள்ள நிலையில், களம் இருமுனைப் போட்டியாக மாறியுள்ளது:

1. வங்கதேச தேசியவாத கட்சி (BNP): தாரிக் ரஹ்மான் (Tarique Rahman) தலைமையில் 10 கட்சிகளின் கூட்டணியுடன் களமிறங்குகிறது. 17 ஆண்டுகால நாடுகடத்தப்பட்ட வாழ்க்கைக்குப் பின் நாடு திரும்பிய ரஹ்மான், இழந்த செல்வாக்கை மீட்கப் போராடுகிறார்.

2. ஜமாத்-இ-இஸ்லாமி (JIB): ஷபிகுர் ரஹ்மான் தலைமையில் 11 கட்சிக் கூட்டணியாக உருவெடுத்துள்ளது. இதில் 2024 போராட்டங்களை முன்னின்று நடத்திய மாணவர்களின் ‘தேசிய குடிமக்கள் கட்சி’ (NCP) ஒரு அங்கமாகும். ஜமாத் கட்சி இம்முறை தனது வரலாற்றிலேயே முதல்முறையாக கிருஷ்ண நந்தி என்ற இந்து வேட்பாளரை நிறுத்தி ஆச்சரியப்படுத்தியுள்ளது.

என்ன நடக்கும்? சர்வதேசப் பார்வை

இந்தத் தேர்தல் முடிவுகள் வங்கதேசத்தின் வெளியுறவுக் கொள்கையையும் மாற்றியமைக்கும்.

பிஎன்பி (BNP) வெற்றி பெற்றால் இந்தியாவுடனான உறவில் ஒரு இணக்கமான சூழல் ஏற்படலாம்.

அதேசமயம் ஜமாத் (JIB) தலைமையிலான கூட்டணி வெற்றி பெற்றால், பாகிஸ்தான், துருக்கி மற்றும் சீனாவுடனான உறவு பலப்பட வாய்ப்புள்ளதாகக் கருதப்படுகிறது.

கடந்த 17 ஆண்டுகளில் இல்லாத வகையில், இம்முறை ஒவ்வொரு வாக்கும் உண்மையான மாற்றத்தை ஏற்படுத்தும் என்ற நம்பிக்கையில் ‘ஜென்-இசட்’ (Gen-Z) தலைமுறை வாக்காளர்கள் ஆர்வத்துடன் காத்துள்ளனர்.