Tuesday, November 17, 2026
spot_img
Homeகனடா செய்திகள்PR – நீண்டகாலமாகக் காத்திருப்போருக்கு மகிழ்ச்சியான அறிவிப்பு!

PR – நீண்டகாலமாகக் காத்திருப்போருக்கு மகிழ்ச்சியான அறிவிப்பு!

கனடாவில் நிரந்தர வதிவிட (Permanent Residence – PR) அனுமதிக்காக நீண்டகாலமாகக் காத்திருப்போருக்கு நம்பிக்கையளிக்கும் வகையில், 2027ஆம் ஆண்டில் கூடுதலாக 2 இலட்சம் நிரந்தர வதிவிட இடங்களை வழங்குவதற்கான திட்டத்தை கனேடிய மத்திய அரசு அறிவித்துள்ளது.

ஏற்கனவே கனடாவில் வசித்து வரும் தகுதியுடையவர்களின் நிரந்தர வதிவிட விண்ணப்பங்களை விரைவாகப் பரிசீலித்து முடிப்பதே இந்தத் திட்டத்தின் முக்கிய நோக்கமாகும்.

குறிப்பாக, ஹொங்கொங் மற்றும் உக்ரைன் குடியேற்ற வழிமுறைகளின் கீழ் விண்ணப்பித்து நீண்டகாலமாகக் காத்திருப்போருக்கு இந்த அறிவிப்பு பெரும் நம்பிக்கையை ஏற்படுத்தியுள்ளது.

இரண்டு ஆண்டுகளுக்கும் மேலாகக் காத்திருந்தவருக்கு மீண்டும் நம்பிக்கை!

கனடாவின் டொராண்டோவில் வசிக்கும் பெலிக்ஸ் டோங் (Felix Tong) என்பவர், தனது நிரந்தர வதிவிட விண்ணப்பத்திற்கான முடிவுக்காக இரண்டு ஆண்டுகளுக்கும் மேலாகக் காத்திருந்துள்ளார்.

இதனால், டொராண்டோவில் கட்டியெழுப்பிய வாழ்க்கையை விட்டுவிட்டு மீண்டும் ஹொங்கொங்கிற்குத் திரும்புவது குறித்தும் அவர் பரிசீலித்து வந்துள்ளார்.

இந்நிலையில், ஹொங்கொங் குடியேற்ற வழிமுறைகளின் கீழ் சமர்ப்பிக்கப்பட்ட விண்ணப்பங்களை விரைவாகப் பரிசீலிக்க நடவடிக்கை எடுக்கப்படும் என கனேடிய அரசாங்கம் அறிவித்துள்ளது.

இதனால், கனடாவில் தொடர்ந்து வசிப்பதற்கான நம்பிக்கை அவருக்கு மீண்டும் ஏற்பட்டுள்ளது.

“இது ஹொங்கொங் மக்களுக்கு மிகப்பெரிய ஆச்சரியமாக அமைந்துள்ளது. நாங்கள் மிகவும் மகிழ்ச்சியடைகிறோம். இந்த ஆண்டு எமது விண்ணப்பம் பரிசீலிக்கப்படாவிட்டால், ஒருவேளை நான் மீண்டும் ஹொங்கொங்கிற்குத் திரும்ப வேண்டியிருக்கும் என நினைத்தேன்” என்று பெலிக்ஸ் டோங் CTV News ஊடகத்திடம் தெரிவித்துள்ளார்.

2 இலட்சம் பேருக்கான PR வாய்ப்புகள் எவ்வாறு பகிரப்படும்?

கனேடிய அரசாங்கத்தின் புதிய திட்டத்தின் கீழ் இரண்டு முக்கிய பிரிவுகளுக்கு தலா ஒரு இலட்சம் நிரந்தர வதிவிட இடங்கள் ஒதுக்கப்படவுள்ளன.

முதலாவது பிரிவு – தொழிலாளர்கள் மற்றும் குடும்ப உறுப்பினர்கள்

கியூபெக் மாகாணத்திற்கு வெளியே உள்ள பகுதிகளில் ஏற்கனவே வசித்து வரும் தொழிலாளர்கள் மற்றும் அவர்களது தகுதியுடைய குடும்ப உறுப்பினர்களுக்காக ஒரு இலட்சம் இடங்கள் ஒதுக்கப்படவுள்ளன.

இதற்குத் தேவையான தொழிலாளர்களை அடையாளம் காண்பதில் மாகாண மற்றும் பிராந்திய அரசாங்கங்களும் பங்களிக்கவுள்ளன.

இரண்டாவது பிரிவு – மனிதாபிமான அடிப்படையிலான விண்ணப்பதாரர்கள்

மனிதாபிமான அடிப்படையில் தகுதியுடையவர்களாகக் கருதப்படும் விண்ணப்பதாரர்களுக்காக மேலும் ஒரு இலட்சம் இடங்கள் ஒதுக்கப்படவுள்ளன.

இதன் கீழ்,

  • ஹொங்கொங் குடியேற்ற வழிமுறைகளின் ஊடாக 32,000 பேர் வரை.
  • உக்ரைன் குடியேற்ற வழிமுறைகளின் ஊடாக 18,800 பேர் வரை.
  • மனிதாபிமான மற்றும் கருணை அடிப்படையில் நிரந்தர வதிவிடத்திற்குத் தகுதி பெற்ற 12,600 பேர் வரை.
  • கனேடிய குடிமக்கள் அல்லது நிரந்தர வதிவிட உரிமையாளர்களுடன் கனடாவில் வசிக்கும் வாழ்க்கைத்துணை, பொதுவாழ்க்கைத் துணை மற்றும் தங்கியிருக்கும் பிள்ளைகள் என 45,000 பேர் வரை.

உள்வாங்கப்படவுள்ளதாக அறிவிக்கப்பட்டுள்ளது.

இந்தப் பிரிவின் விண்ணப்பங்களை 2027ஆம் ஆண்டு இறுதிக்குள் பரிசீலித்து முடிக்க அரசாங்கம் இலக்கு நிர்ணயித்துள்ளது.

குறிப்பாக, ஹொங்கொங் குடியேற்றத் திட்டங்களுக்கான விண்ணப்பங்கள் இந்த ஆண்டு ஓகஸ்ட் மாதத்திலும், உக்ரைன் திட்டத்திற்கான விண்ணப்பங்கள் இரண்டு ஆண்டுகளுக்கு முன்னரும் நிறுத்தப்பட்டுள்ளன. எனவே, ஏற்கனவே விண்ணப்பித்துக் காத்திருப்போரின் விண்ணப்பங்களை நிறைவு செய்வதே இந்த நடவடிக்கையின் நோக்கமாகும்.

2027இல் 5 இலட்சத்து 80 ஆயிரம் பேருக்கு நிரந்தர வதிவிடமா?

கனடாவின் வழக்கமான 2027ஆம் ஆண்டுக்கான குடியேற்ற இலக்கு 3 இலட்சத்து 80 ஆயிரம் பேராக நிர்ணயிக்கப்பட்டுள்ளது.

இதற்கு மேலதிகமாக அறிவிக்கப்பட்டுள்ள 2 இலட்சம் நிரந்தர வதிவிட இடங்களையும் சேர்த்தால், 2027ஆம் ஆண்டில் மொத்தமாக 5 இலட்சத்து 80 ஆயிரம் பேர் நிரந்தர வதிவிட அந்தஸ்தைப் பெறக்கூடும் என வான்கூவரைச் சேர்ந்த குடியேற்றச் சட்டத்தரணியும் கொள்கை ஆய்வாளருமான ரிச்சர்ட் குர்லாண்ட் தெரிவித்துள்ளார்.

இதற்கிடையில், கனேடிய குடியேற்றச் சட்டத்தரணி வோரன் கிரியேட்ஸ் கருத்துத் தெரிவிக்கையில், பல ஆண்டுகளாக நிரந்தர வதிவிட அனுமதிக்காகக் காத்திருப்போரின் நிச்சயமற்ற நிலையை இந்த நடவடிக்கை முடிவுக்குக் கொண்டுவர உதவும் எனக் குறிப்பிட்டுள்ளார்.

மறுபுறம், கன்சர்வேட்டிவ் கட்சியின் குடியேற்ற விவகார விமர்சகர் மிச்செல் ரெம்பல் கார்னர், பிரதமர் மார்க் கார்னி வரலாற்றிலேயே அதிகளவிலான நிரந்தர குடியேற்றத்தை அறிவித்துவிட்டு அதனை மறைக்க முயற்சித்துள்ளதாக சமூக ஊடகப் பதிவொன்றில் விமர்சித்துள்ளார்.

இதனால், கனடாவின் 2027ஆம் ஆண்டுக்கான குடியேற்றத் திட்டம் தொடர்பில் அரசியல் மற்றும் குடியேற்றத் துறைகளில் விவாதங்கள் எழுந்துள்ளன.

RELATED ARTICLES
- Advertisment -
Google search engine

Most Popular

Recent Comments