ரம்ஜான் சீசன் 2026: ஹலீம் விலையை உயர்த்த உணவகங்கள் முடிவு.

ரம்ஜான் புனித மாதம் நெருங்கி வரும் வேளையில், ஹைதராபாத்தின் அடையாளமாகத் திகழும் ‘ஹலீம்’ (Haleem) விலை இந்த ஆண்டு கணிசமாக உயரக்கூடும் எனத் தெரிகிறது.

மூலப்பொருட்களின் விலை விண்ணைத் தொட்டுள்ள நிலையில், சாமானியர்களின் தட்டுகளில் இந்த அரச உணவு ஏறுமா என்ற கேள்வி எழுந்துள்ளது.

விலையேற்றத்தின் பின்னணி: ஒரு கள ஆய்வு

கடந்த ஓராண்டில் அத்தியாவசியப் பொருட்களின் விலை முன்னெப்போதும் இல்லாத வகையில் அதிகரித்துள்ளது.

இது குறித்து ஷா கோஸ் (Shah Ghouse) உணவகத்தின் உரிமையாளர் முகமது ரப்பானி கூறுகையில்,

“கடந்த ஆண்டுடன் ஒப்பிடுகையில் சில பொருட்களின் விலை பலமடங்கு உயர்ந்துள்ளது. எனவே, ஹலீம் விலையில் சிறிய அளவிலான மாற்றமாவது தவிர்க்க முடியாதது,” எனத் தெரிவித்தார்.

விஜயநகர் காலனியில் உள்ள அல்-சஃபா (Al-Safa) ஹோட்டல் மேலாளர் முகமது ஆமீர் கூறுகையில்,

“குறிப்பாக இறைச்சி மற்றும் நெய் ஆகியவற்றின் விலை உயர்வு ஹலீம் தயாரிப்புச் செலவை நேரடியாகப் பாதித்துள்ளது. இதனால் ஒரு தட்டுக்கு 10 முதல் 15 ரூபாய் வரை விலை அதிகரிக்க வாய்ப்புள்ளது,” என்கிறார்.

கடும் போட்டியும் குறைந்த லாபமும்

ஹைதராபாத் ஹலீம் சந்தை என்பது பல கோடி ரூபாய் புழங்கும் ஒரு களம்.

பிஸ்தா ஹவுஸ் (Pista House), ஷா கோஸ், கஃபே 555 (Café 555), பஹார் கஃபே (Bahar Café), மெஹ்ஃபில் (Mehfil) போன்ற ஜாம்பவான்கள் களத்தில் இருப்பதால், விலையை நிர்ணயிப்பதில் கடும் போட்டி நிலவுகிறது.

“ஹலீம் சந்தையில் லாப வரம்பு (Profit Margin) மிகவும் குறைவு. விலையை உயர்த்தினால் வாடிக்கையாளர்களை இழக்க நேரிடும், உயர்த்தாவிட்டால் நஷ்டம் ஏற்படும். எனவே, போட்டியாளர்களின் விலையை ஆராய்ந்தே இறுதி முடிவை எடுக்க முடியும்,” எனப் பிரபல உணவக உரிமையாளர் ஒருவர் தனது கவலையைப் பகிர்ந்து கொண்டார்.

நகர எல்லைகளைத் தாண்டிய ஹலீம் மோகம்

முன்பு பழைய நகர் மற்றும் முக்கியப் பகுதிகளில் மட்டுமே கிடைத்து வந்த ஹலீம், தற்போது நாகரம், கீசரா, குஷாய்குடா, அப்துல்லாபூர்மெட் மற்றும் கோம்பள்ளி போன்ற புறநகர் பகுதிகளுக்கும் விரிவடைந்துள்ளது.

புறநகர் பகுதிகளில் உள்ள பொறியியல் கல்லூரிகள் மற்றும் விடுதிகளில் தங்கியுள்ள மாணவர்கள் ஹலீமின் முக்கிய வாடிக்கையாளர்களாக மாறியுள்ளனர்.

அப்துல்லாபூர்மெட் பகுதியைச் சேர்ந்த உணவக உரிமையாளர் ஜெகதீஷ் கவுட் கூறுகையில்,

“இங்கு ஹலீமுக்கு பெரும் தேவை உள்ளது. ஒவ்வொரு ஆண்டும் உள்ளூர் சமையல் கலைஞர்களைக் கொண்டு பிரத்யேகமான மட்டன் ஹலீமைத் தயாரிக்கிறோம்,” என்றார்.

வரலாற்றுப் பின்னணி: அரண்மனை முதல் அடித்தட்டு மக்கள் வரை

மத்திய கிழக்கு மற்றும் மத்திய ஆசியாவைப் பூர்வீகமாகக் கொண்ட இந்த ஹலீம், கோதுமை, இறைச்சி, நெய், மசாலாப் பொருட்கள் மற்றும் உலர் பழங்களைக் கொண்டு பல மணிநேரம் மெதுவாக வேகவைக்கப்படும் ஒரு சத்தான உணவாகும்.

1956-ஆம் ஆண்டு பத்தர்கட்டியில் உள்ள மதீனா ஹோட்டல் (Madina Hotel) முதன்முதலில் ஹலீமைத் தனது மெனுவில் சேர்த்தது.

அதுவரை நிஜாம் அரண்மனைகளில் மட்டுமே பரிமாறப்பட்ட இந்த அரச உணவு, அதன் பிறகுதான் ஹைதராபாத் சாமானிய மக்களின் விருப்பமான உணவாக மாறியது என்பது குறிப்பிடத்தக்கது.