இந்தியா – கனடா அதிரடி முடிவு: தேசிய மற்றும் சைபர் பாதுகாப்பில் கைகோர்க்கும் இரு நாடுகள்!

இந்தியா மற்றும் கனடா இடையிலான உறவில் ஒரு முக்கிய மைல்கல்லாக, தேசிய பாதுகாப்பு, சட்ட அமலாக்கம் மற்றும் சைபர் பாதுகாப்பு (Cybersecurity) ஆகிய துறைகளில் ஒத்துழைப்பை வலுப்படுத்த இரு நாடுகளும் இணக்கம் தெரிவித்துள்ளன.

எல்லை தாண்டிய குற்றங்கள் மற்றும் வளர்ந்து வரும் தொழில்நுட்ப சவால்களை எதிர்கொள்ள ஒரு கூட்டுச் செயல் திட்டத்தை (Work plan) உருவாக்க இரு நாட்டு உயர்மட்ட அதிகாரிகளும் முடிவு செய்துள்ளனர்.

தேசிய பாதுகாப்பு ஆலோசகர்களின் முக்கிய சந்திப்பு

கனடாவின் ஒட்டாவா (Ottawa) நகரில் கடந்த சனிக்கிழமை நடைபெற்ற ஆக்கபூர்வமான சந்திப்பில் இந்த வரலாற்றுச் சிறப்புமிக்க முடிவு எடுக்கப்பட்டது.

இந்திய தேசிய பாதுகாப்பு ஆலோசகர் (NSA) அஜித் தோவல் மற்றும் அவரது கனடிய இணையரான நதாலி ட்ரூயின் (Nathalie Drouin) ஆகியோர் இந்த உயர்மட்டப் பேச்சுவார்த்தையில் பங்கேற்றனர்.

இந்தச் சந்திப்பு குறித்து இந்திய வெளியுறவு அமைச்சகம் (MEA) வெளியிட்டுள்ள அறிக்கையில்,

இரு நாடுகளின் குடிமக்களின் பாதுகாப்பு மற்றும் நாட்டின் இறையாண்மையைப் பாதுகாப்பதற்கான முன்னெடுப்புகளில் ஏற்பட்டுள்ள முன்னேற்றங்களை இரு தரப்பும் அங்கீகரித்துள்ளதாகக் குறிப்பிடப்பட்டுள்ளது.

தொடர்பு அதிகாரிகள் நியமனம் மற்றும் தகவல் பரிமாற்றம்

இரு நாடுகளுக்கும் இடையே நிலவும் பாதுகாப்புச் சவால்களைக் களைவதற்கு, நேரடித் தொடர்பு அதிகாரிகளை (Liaison officers) நியமிக்க இரு தரப்பிலும் ஒப்புக்கொள்ளப்பட்டுள்ளது.

பாதுகாப்பு மற்றும் சட்ட அமலாக்க முகமைகளுக்கு இடையே நேரடி உறவை வளர்ப்பதன் மூலம், முக்கியமான தகவல்களை உரிய நேரத்தில் பரிமாறிக்கொள்ள முடியும்.

குறிப்பாக, பின்வரும் விவகாரங்களில் இந்த ஒத்துழைப்பு மிக முக்கியப் பங்கு வகிக்கும்:

• போதைப்பொருள் கடத்தல்: சர்வதேச அளவில் பெரும் அச்சுறுத்தலாக விளங்கும் ஃபெண்டானில் (Fentanyl) போன்ற போதைப்பொருட்களின் சட்டவிரோதப் புழக்கத்தைக் கட்டுப்படுத்துதல்.

• குற்றவியல் நெட்வொர்க்குகள்: எல்லை தாண்டிச் செயல்படும் ஒழுங்கமைக்கப்பட்ட குற்றக் கும்பல்களை (Transnational organised criminal networks) ஒடுக்குதல்.

• இருதரப்புத் தொடர்பு: இரு நாடுகளுக்கும் இடையே தகவல் தொடர்பைச் சீரமைத்து, பரஸ்பர கவலைக்குரிய விடயங்களில் விரைந்து செயல்படுதல்.

சைபர் பாதுகாப்பு மற்றும் குடிவரவு விவகாரங்கள்

நவீன கால அச்சுறுத்தலான சைபர் குற்றங்களை எதிர்கொள்ள, சைபர் பாதுகாப்பு கொள்கை மற்றும் தகவல் பரிமாற்றத்தை (Information sharing on cybersecurity issues) முறைப்படுத்தவும் இரு நாடுகளும் உறுதியளித்துள்ளன.

இதற்காக ஒரு முறையான கட்டமைப்பை (Formalising cooperation) உருவாக்கத் திட்டமிடப்பட்டுள்ளது.

மேலும், நிதி மோசடிகள் (Fraud) மற்றும் முறையற்ற குடிவரவு (Immigration enforcement) தொடர்பான சிக்கல்களைக் கையாள்வதற்கும், சர்வதேச கடமைகளுக்கு உட்பட்டு உள்நாட்டுச் சட்டங்களின் அடிப்படையில் தொடர்ந்து ஆலோசனைகளை முன்னெடுக்க முடிவு செய்யப்பட்டுள்ளது.

இந்தப் பயணத்தின் ஒரு பகுதியாக,

இந்திய பாதுகாப்பு ஆலோசகர் அஜித் தோவல், கனடாவின் பொதுப் பாதுகாப்புத்துறை அமைச்சர் கேரி ஆனந்தசங்கரி (Gary Anandasangaree) அவர்களையும் நேரில் சந்தித்துப் பேசினார்.