விசா மோசடி: சிக்கிய இலங்கை நபர்!

பெங்களூரு கெம்பேகவுடா சர்வதேச விமான நிலையத்தில் (KIA) தனது விசா மற்றும் போர்டிங் பாஸைப் பயன்படுத்தி நண்பரை லண்டனுக்கு அனுப்பி வைத்த இலங்கை வம்சாவளி பிரித்தானியப் பிரஜை ஒருவர் அதிரடியாகக் கைது செய்யப்பட்டுள்ளார்.

திட்டமிட்ட நூதன மோசடி

பிரித்தானியக் குடியுரிமை பெற்ற காந்தையா ராஜகோபால் என்ற நபரே இவ்வாறு கைது செய்யப்பட்டுள்ளார். இச்சம்பவம் குறித்து காவல்துறை வெளியிட்ட தகவல்கள் வருமாறு:

• ஆள்மாறாட்டம்: ராஜகோபால் தனது நண்பரான சரூஷன் குணசேகரனை முன்கூட்டியே விமான நிலையத்திற்கு வரவழைத்துள்ளார்.

• ஆவணப் பரிமாற்றம்: தனது உண்மையான விசா மற்றும் போர்டிங் பாஸை சரூஷனிடம் கொடுத்து அவரை லண்டன் செல்லும் விமானத்தில் ஏற்றிவிட்டுள்ளார்.

• நாடகம்: நண்பர் விமானத்தில் ஏறிய பிறகு, தனது ஆவணங்கள் காணாமல் போய்விட்டதாக ராஜகோபால் அதிகாரிகளிடம் நாடகமாடியுள்ளார்.

காவல்துறையிடம் சிக்கியது எப்படி?

புதிய ஆவணங்களைப் பெற ராஜகோபால் முயன்றபோது, அவரது நடவடிக்கையில் அதிகாரிகளுக்குச் சந்தேகம் ஏற்பட்டுள்ளது. இதனையடுத்து காவல்துறையினர் மேற்கொண்ட தீவிர விசாரணையில், அவர் ஏற்கனவே தனது ஆவணங்களை வைத்து நண்பரை லண்டனுக்கு அனுப்பி வைத்தது அம்பலமானது.

உயர்மட்ட விசாரணை

சம்பவம் குறித்து வடகிழக்கு மண்டல துணை ஆணையர் மிதுன் குமார் கூறுகையில், “வெளிநாட்டிற்கு ஆள்மாறாட்டம் செய்து செல்ல உதவிய குற்றத்திற்காக இவர் கைது செய்யப்பட்டுள்ளார். தற்போது அவர் போலீஸ் காவலில் வைக்கப்பட்டுள்ளார்,” எனத் தெரிவித்தார்.

லண்டனுக்குச் சென்ற சரூஷன் அங்கு அகதி அந்தஸ்து கோரத் திட்டமிட்டிருக்கலாம் எனப் போலீஸார் சந்தேகிக்கின்றனர். பாதுகாப்புச் சோதனைகளைத் தாண்டி சரூஷன் எப்படி விமானத்திற்குள் சென்றார் என்பது குறித்து பி.ஐ.ஏ.எல் (BIAL) அதிகாரிகள் தீவிர விசாரணை நடத்தி வருகின்றனர்.