கனடாவின் டொராண்டோ நகரில் உள்ள ஸ்கார்பாரோ பகுதியில், தனது மூன்று குழந்தைகளை அவர்களின் தாயே கடத்திச் சென்றதாக டொராண்டோ காவல் துறையினர் அவசர தகவல் வெளியிட்டு பொதுமக்களின் உதவியை நாடியுள்ளனர்.
மிட்லேண்ட் அவென்யூ மற்றும் எக்லிண்டன் அவென்யூ ஈஸ்ட் பகுதியில் குடும்ப உறுப்பினர் ஒருவரைப் பார்க்க வந்திருந்தபோது இந்த கடத்தல் சம்பவம் நிகழ்ந்துள்ளது. நான்கு மாதக் குழந்தை அனஸ்தேசியா, மூன்று வயது இரினா மற்றும் ஆறு வயது டேனியல் ஆகியோரை அவர்களது தாயான இருபத்திரண்டு வயது சோமர்டா மிக்லெஸ்கு அழைத்துச் சென்றுள்ளார்.
அந்தப் பெண்ணுக்கு குழந்தைகளை வளர்ப்பதற்கான சட்டப்பூர்வ உரிமை இல்லை என்பதும், பெற்றோரே குழந்தைகளை கடத்துதல் என்ற குற்றச்சாட்டின் கீழ் அவர் தேடப்பட்டு வருவதும் குறிப்பிடத்தக்கது. சந்தேகத்திற்குரிய சோமர்டா மிக்லெஸ்கு ஐந்து அடி ஏழு அங்குல உயரமும், நூற்றியெண்பது பவுண்டுகள் எடையும், நீண்ட கருப்பு முடியும் கொண்டவர் என அடையாளம் காணப்பட்டுள்ளார்.
கடைசியாக அவர் கருப்பு நிற நீண்ட சட்டை அணிந்திருந்தார். மேலும், ஒன்டாரியோ பதிவு எண் DJJS 875 கொண்ட 2017-ஆம் ஆண்டு வெள்ளை நிற ஃபோர்டு எக்ஸ்பெடிஷன் காரில் அவர் பயணிப்பதாக சந்தேகிக்கப்படுகிறது. குழந்தைகளுக்கான அவசர அபாய எச்சரிக்கை எனப்படும் ஆம்பர் அலர்ட் இதுவரை விடுக்கப்படவில்லை.
குழந்தைகளுக்கு உடனடி ஆபத்து இருப்பதாகக் கருதினால் மட்டுமே அத்தகைய எச்சரிக்கை விடப்படும் எனவும், புலனாய்வாளர்களின் மதிப்பீட்டின் அடிப்படையிலேயே அடுத்தகட்ட நடவடிக்கைகள் எடுக்கப்படும் எனவும் காவல்துறையினர் தெரிவித்துள்ளனர். தகவல் அறிந்த பொதுமக்கள் உடனடியாக 416-808-4100 என்ற எண்ணில் டொராண்டோ காவல் துறையை தொடர்பு கொள்ளுமாறு கேட்டுக் கொள்ளப்பட்டுள்ளனர்.
