கனடாவின் நிரந்தரக் குடியுரிமையைப் பெறுவதற்கான Express Entry குடியேற்றத் திட்டத்தில் புதிய மாற்றங்களை அந்நாட்டு அரசாங்கம் அறிவித்துள்ளது.
இதன்படி, 2026 நவம்பர் 3ஆம் திகதி முதல் தகுதியான கனடிய வேலை அனுபவம் கொண்டவர்களுக்கும், அதிக ஊதியம் வழங்கப்படும் குறிப்பிட்ட தொழில்களில் தகுதியான வேலைவாய்ப்புச் சலுகைகளைப் பெற்றவர்களுக்கும் கூடுதல் புள்ளிகள் வழங்கப்படவுள்ளன.
கனடாவின் குடிவரவு, அகதிகள் மற்றும் குடியுரிமைத் திணைக்களம் (IRCC) இந்த மாற்றங்களை அறிவித்துள்ளது.
யாருக்கு கூடுதல் புள்ளிகள் கிடைக்கும்?
புதிய முறையின் கீழ், கனடாவில் தகுதியான தொழில்களில் குறைந்தது 12 மாதங்கள் வேலை அனுபவம் பெற்றவர்கள், அவர்களின் தொழிலின் ஊதிய நிலையைப் பொறுத்து கூடுதல் புள்ளிகளைப் பெற முடியும்.
இதன்படி, தொழிலின் சராசரி ஊதியம் கனடாவின் ஒட்டுமொத்த சராசரி ஊதியத்தை விட இரண்டு மடங்கு அல்லது அதற்கு அதிகமாக இருக்கும் பிரிவில் தகுதியான வேலை அனுபவம் பெற்றவர்களுக்கு 70 கூடுதல் புள்ளிகள் வழங்கப்படலாம்.
சராசரி ஊதியம் ஒன்றரை மடங்கு அல்லது அதற்கு அதிகமாக இருக்கும் தகுதியான தொழில்களில் பணியாற்றியவர்களுக்கு 40 புள்ளிகளும், 1.3 மடங்கு அல்லது அதற்கு அதிகமான ஊதிய நிலையைப் பூர்த்தி செய்யும் தொழில்களில் பணியாற்றியவர்களுக்கு 20 புள்ளிகளும் வழங்கப்படலாம்.
இந்தப் புள்ளிகள் பெறுவதற்கு குறைந்தது 12 மாத தகுதியான கனடிய வேலை அனுபவம் உள்ளிட்ட நிபந்தனைகளைப் பூர்த்தி செய்ய வேண்டும்.
வேலைவாய்ப்புச் சலுகைகளுக்கும் கூடுதல் புள்ளிகள்
கனடாவில் அதிக ஊதியம் வழங்கப்படும் தகுதியான தொழில்களில் வேலைவாய்ப்புச் சலுகைகளைப் பெற்றவர்களுக்கும் புதிய முறையில் கூடுதல் புள்ளிகள் வழங்கப்படவுள்ளன.
இதன்படி, குறிப்பிட்ட தொழிலின் சராசரி ஊதியத்தை விட இரண்டு மடங்கு அல்லது அதற்கு அதிகமான ஊதிய நிலைக்குப் பொருந்தும் வேலைவாய்ப்புச் சலுகைகளுக்கு 100 புள்ளிகளும், ஒன்றரை மடங்கு அல்லது அதற்கு அதிகமான ஊதிய நிலைக்குப் பொருந்தும் சலுகைகளுக்கு 70 புள்ளிகளும், 1.3 மடங்கு அல்லது அதற்கு அதிகமான ஊதிய நிலைக்குப் பொருந்தும் சலுகைகளுக்கு 50 புள்ளிகளும் வழங்கப்படலாம்.
இங்கு குறிப்பிடப்படும் அதிக ஊதிய நிலை என்பது விண்ணப்பதாரரின் தனிப்பட்ட சம்பளத்தை மட்டும் அடிப்படையாகக் கொண்டதல்ல. குறித்த தொழிலில் கனடா முழுவதும் நிலவும் சராசரி ஊதியத் தரவுகளின் அடிப்படையிலேயே அது தீர்மானிக்கப்படும்.
மேலும், கனடாவில் ஏற்கனவே வேலை அனுபவம் பெற்ற ஒருவர், தமது வேலை அனுபவத்திற்கான புள்ளிகளையும் அதிக ஊதியத் தொழிலுக்கான கூடுதல் புள்ளிகளையும் பெறக்கூடிய வாய்ப்புள்ளது.
எனினும், கனடிய வேலை அனுபவத்தின் அடிப்படையிலான புள்ளிகளையும் வேலைவாய்ப்புச் சலுகையின் அடிப்படையிலான புள்ளிகளையும் ஒன்றாகச் சேர்த்துப் பெற முடியாது. இவ்விரண்டில் அதிக புள்ளிகளை வழங்கும் தகுதியான தெரிவு கணக்கில் எடுத்துக்கொள்ளப்படும்.
LMIA தொடர்பிலும் முக்கிய மாற்றம்
புதிய மாற்றத்தின் மற்றொரு முக்கிய அம்சமாக, தகுதியான வேலைவாய்ப்புச் சலுகைகளுக்கு புள்ளிகள் பெறுவதற்கும், குறிப்பிட்ட மத்திய திறனாளர் மற்றும் திறன் தொழிலாளர் குடியேற்றத் திட்டங்களின் தகுதிநிபந்தனைகளைப் பூர்த்தி செய்வதற்கும் Labour Market Impact Assessment (LMIA) அவசியமாக இருக்காது என கனடா அறிவித்துள்ளது.
இதனால், தகுதியான வேலைவாய்ப்புச் சலுகைகளைப் பெற்ற விண்ணப்பதாரர்களுக்கும் முதலாளிகளுக்கும் விண்ணப்ப நடைமுறைகள் எளிமையடையலாம்.
எனினும், வேலைவாய்ப்புச் சலுகை உண்மையானதா, முதலாளி உரிய நிபந்தனைகளைப் பூர்த்தி செய்கிறாரா, விண்ணப்பதாரர் அந்த வேலையைச் செய்வதற்குத் தகுதியானவரா என்பன குடிவரவு அதிகாரிகளால் தொடர்ந்து பரிசோதிக்கப்படும்.
LMIA இல்லாதது மட்டும் ஒருவருக்கு கூடுதல் புள்ளிகள் அல்லது நிரந்தரக் குடியுரிமையை உறுதிப்படுத்தாது.
ஏற்கனவே விண்ணப்பித்தவர்களுக்கு என்ன நடக்கும்?
Express Entry விண்ணப்பதாரர்களின் தற்போதைய புள்ளிகள் புதிய முறைக்கு ஏற்ப தானாகவே மீளக் கணக்கிடப்படும் என கனடா அரசாங்கம் தெரிவித்துள்ளது.
இந்தச் செயல்முறை நிறைவடைய இரண்டு வாரங்கள் வரை செல்லக்கூடும். இதன்போது புதிய விண்ணப்பதாரர்களுக்கு அழைப்பு விடுக்கும் சுற்றுகள் தற்காலிகமாக நிறுத்தப்பட்டு, மீளக் கணக்கீடு முடிந்ததும் மீண்டும் ஆரம்பிக்கப்படும்.
வேலைவாய்ப்புச் சலுகையின் அடிப்படையில் புள்ளிகளைப் பெறக்கூடியவர்கள், தேவையான தகவல்கள் அனைத்தும் தமது Express Entry சுயவிவரத்தில் சரியாகப் பதிவிடப்பட்டுள்ளனவா என்பதை நவம்பர் 3ஆம் திகதிக்கு முன்னர் உறுதிப்படுத்துமாறு அறிவுறுத்தப்பட்டுள்ளனர்.
கனடாவின் குடியேற்றக் கொள்கையில் புதிய அணுகுமுறை
கனடாவின் பொருளாதாரத் தேவைகளுக்கும் தொழிலாளர் சந்தையின் தேவைகளுக்கும் ஏற்ப திறமையான வெளிநாட்டுத் தொழிலாளர்களை ஈர்த்து, தக்கவைத்துக்கொள்வதே இந்த மாற்றங்களின் நோக்கம் என அந்நாட்டு குடிவரவு அதிகாரிகள் தெரிவித்துள்ளனர்.
எனினும், கூடுதல் புள்ளிகளைப் பெறுவது நிரந்தரக் குடியுரிமைக்கான அழைப்பை உறுதிப்படுத்தாது. ஒவ்வொரு அழைப்புச் சுற்றிலும் நிர்ணயிக்கப்படும் நிபந்தனைகள் மற்றும் புள்ளி வரம்புகளை விண்ணப்பதாரர்கள் பூர்த்தி செய்ய வேண்டியிருக்கும்.
கனடாவுக்குக் குடிபெயர விரும்புவோர் தங்களது தகுதி மற்றும் வேலைவாய்ப்புத் தகவல்களை அதிகாரப்பூர்வ குடிவரவு இணையத்தளத்தில் சரிபார்த்துக்கொள்வது அவசியமாகும்.
