அமெரிக்காவின் வரி நடவடிக்கைகளால் பாதிக்கப்பட்டுள்ள கனடாவின் எஃகு மற்றும் வாகன உற்பத்தித் துறைகளைப் பாதுகாப்பதற்காக, 8.7 பில்லியன் கனேடிய டொலர் பெறுமதியான புதிய நிதித் திட்டத்தை கனடா மத்திய அரசாங்கமும் ஒன்ராறியோ மாகாண அரசாங்கமும் இணைந்து அறிவித்துள்ளன.
கனடா பிரதமர் மார்க் கார்னி மற்றும் ஒன்ராறியோ மாகாண முதல்வர் டக் ஃபோர்ட் ஆகியோர் இந்தத் திட்டத்தை ஒக்டோபர் 21ஆம் திகதி ஒட்டாவாவில் அறிவித்துள்ளனர்.
அமெரிக்க ஜனாதிபதி டொனால்ட் ட்ரம்ப் நிர்வாகம் விதித்துள்ள வரிகள் காரணமாக, கனடாவின் முக்கிய உற்பத்தித் துறைகள் பாதிப்புகளை எதிர்கொண்டுள்ள நிலையில், தொழிற்துறைகளை வலுப்படுத்துவதும் தொழிலாளர்களின் வேலைவாய்ப்புகளைப் பாதுகாப்பதும் இந்தத் திட்டத்தின் முக்கிய நோக்கங்களாகும்.
எஃகுத் தொழில்துறைக்கு 5.2 பில்லியன் டொலர்
இந்தத் திட்டத்தின் கீழ், கனடாவின் எஃகுத் தொழில்துறையைப் பாதுகாப்பதற்காக அடுத்த ஐந்து ஆண்டுகளில் சுமார் 5.22 பில்லியன் கனேடிய டொலர்கள் ஒதுக்கப்படவுள்ளன.
இதில் கனடா மத்திய அரசாங்கம் 3.55 பில்லியன் டொலர்களையும் ஒன்ராறியோ மாகாண அரசாங்கம் 1.67 பில்லியன் டொலர்களையும் வழங்கவுள்ளன.
இந்த நிதி மூலம் எஃகு உற்பத்தி நிறுவனங்களை நவீனமயப்படுத்துதல், உற்பத்தித் திறனை அதிகரித்தல், புதிய வெளிநாட்டுச் சந்தைகளைக் கண்டறிதல் மற்றும் கனடாவின் உள்நாட்டுத் தேவைகளுக்கான விநியோகத்தை வலுப்படுத்துதல் போன்ற நடவடிக்கைகள் முன்னெடுக்கப்படவுள்ளன.
மேலும், வெளிநாடுகளில் இருந்து குறைந்த விலையில் எஃகு இறக்குமதி செய்யப்படுவதால் உள்ளூர் உற்பத்தியாளர்கள் எதிர்கொள்ளும் போட்டியைக் கண்காணித்து, நியாயமற்ற வர்த்தக நடவடிக்கைகளுக்கு எதிராக நடவடிக்கை எடுப்பதற்கும் அரசாங்கம் திட்டமிட்டுள்ளது.
வாகன உற்பத்தித் துறைக்கு 2.5 பில்லியன் டொலர்
கனடாவின் வாகன உற்பத்தித் துறையைப் பாதுகாப்பதற்காக அடுத்த இரண்டு ஆண்டுகளில் 2.5 பில்லியன் கனேடிய டொலர்கள் முதலீடு செய்யப்படவுள்ளன.
இதில் மத்திய அரசாங்கம் அதிகபட்சமாக 1.5 பில்லியன் டொலர்களையும் ஒன்ராறியோ மாகாண அரசாங்கம் ஒரு பில்லியன் டொலர்களையும் வழங்கவுள்ளன.
இந்த முதலீட்டின் மூலம் வாகன உற்பத்தி நிறுவனங்கள் தங்களது உற்பத்தி வரிசைகளை நவீனமயப்படுத்தவும் புதிய தொழில்நுட்பங்களைப் பயன்படுத்தவும் எதிர்கால வாகன உற்பத்திக்குத் தேவையான முதலீடுகளை மேற்கொள்ளவும் ஆதரவு வழங்கப்படவுள்ளது.
கனடாவில் வாகன உற்பத்தித் துறையுடன் நேரடியாகத் தொடர்புடைய 120,000க்கும் அதிகமான வேலைவாய்ப்புகளைப் பாதுகாப்பது குறித்தும் அரசாங்கம் கவனம் செலுத்தியுள்ளது.
வடக்கு ஒன்ராறியோவின் கனிம வள அபிவிருத்திக்கு நிதி
இதற்கிடையில், வடக்கு ஒன்ராறியோவின் ‘ரிங் ஒஃப் ஃபயர்’ (Ring of Fire) பகுதியில் கனிம வள அபிவிருத்தியை முன்னெடுப்பதற்கான வீதிக் கட்டமைப்புகளை மேம்படுத்துவதற்காக கனடா மத்திய அரசாங்கம் மூன்று ஆண்டுகளில் ஒரு பில்லியன் டொலர் வரை முதலீடு செய்யவுள்ளது.
முக்கிய கனிம வளங்களைப் பயன்படுத்தி பொருளாதார வளர்ச்சியை அதிகரித்தல், புதிய முதலீடுகளை ஈர்த்தல் மற்றும் வேலைவாய்ப்புகளை உருவாக்குதல் ஆகியவை இந்தத் திட்டத்தின் நோக்கங்களாகக் குறிப்பிடப்பட்டுள்ளன.
அமெரிக்க வரி நடவடிக்கைகளின் தாக்கம்
அமெரிக்காவின் வரி நடவடிக்கைகள் கனடா–அமெரிக்க வர்த்தக உறவுகளில் பாதிப்புகளை ஏற்படுத்தியுள்ளதாக கனடா பிரதமர் மார்க் கார்னி தெரிவித்துள்ளார்.
கனடாவின் வாகன ஏற்றுமதி அமெரிக்காவுக்கு 10 சதவீதத்துக்கும் அதிகமாகக் குறைந்துள்ளதுடன், அமெரிக்காவிலிருந்து கனடாவுக்கான ஏற்றுமதியும் 20 சதவீதத்துக்கும் அதிகமாக வீழ்ச்சியடைந்துள்ளதாக அவர் குறிப்பிட்டுள்ளார்.
இரு நாடுகளுக்கும் இடையிலான வர்த்தகப் பேச்சுவார்த்தைகளை மீண்டும் முன்னெடுக்க கனடா தயாராக இருப்பதாகவும் கார்னி தெரிவித்துள்ளார்.
அதேவேளை, அமெரிக்காவை மட்டும் நம்பியிருக்கும் வர்த்தகக் கட்டமைப்பிலிருந்து விலகி, ஏனைய சர்வதேசச் சந்தைகளுடனான வர்த்தக உறவுகளை விரிவுபடுத்துவதற்கும் கனடா நடவடிக்கை எடுத்து வருகின்றது.
இந்த நிலையில், எஃகு மற்றும் வாகன உற்பத்தித் துறைகளுக்கான புதிய நிதித் திட்டம் கனடாவின் பொருளாதாரத்தையும் தொழிலாளர்களின் வேலைவாய்ப்புகளையும் எந்தளவுக்குப் பாதுகாக்கும் என்பது எதிர்காலத்தில் தெரியவரும்.
