அமெரிக்காவுடனான வர்த்தகச் சார்பைக் குறைத்து, சர்வதேச நாடுகளுடனான பொருளாதார உறவுகளை வலுப்படுத்தும் நோக்கில் கனடா பிரதமர் மார்க் கார்னி துருக்கிக்கு விஜயம் மேற்கொண்டுள்ளார்.
இதன் ஒரு பகுதியாக, துருக்கி ஜனாதிபதி ரெசெப் தையிப் எர்டோகனைச் சந்தித்துள்ள அவர், இரு நாடுகளுக்கும் இடையிலான வர்த்தகம், எரிசக்தி, பாதுகாப்பு மற்றும் முதலீட்டு ஒத்துழைப்பை விரிவுபடுத்துவது தொடர்பில் கலந்துரையாடியுள்ளார்.
கனடா பிரதமர் ஒருவர் துருக்கிக்கு மேற்கொள்ளும் முதலாவது தனிப்பட்ட இருதரப்பு விஜயம் இதுவாகும். அமெரிக்காவுடனான வர்த்தகப் பதற்றங்கள் அதிகரித்துள்ள சூழலில், மாற்று வர்த்தகப் பங்காளிகளை உருவாக்குவதற்கு கனடா முன்னுரிமை அளித்து வருகின்றது.
குறிப்பாக, பாதுகாப்புத் தொழில்துறை, அணுசக்தி, சுரங்கத் தொழில், விமானத் தொழில்நுட்பம் மற்றும் முக்கிய கனிமங்கள் போன்ற துறைகளில் இரு நாடுகளுக்கும் இடையிலான ஒத்துழைப்பை அதிகரிப்பது குறித்து கவனம் செலுத்தப்பட்டுள்ளது.
மேலும், இரு நாடுகளுக்கும் இடையிலான தடையற்ற வர்த்தக ஒப்பந்தப் பேச்சுவார்த்தைகளை முன்னெடுப்பது தொடர்பிலும் கலந்துரையாடல்கள் இடம்பெற்றுள்ளன. எரிசக்தித் துறையில் அணுமின் உற்பத்தி மற்றும் திரவமாக்கப்பட்ட இயற்கை எரிவாயு தொடர்பான சாத்தியக்கூறுகளும் ஆராயப்படவுள்ளன.
கனடாவின் மொத்த ஏற்றுமதியில் அமெரிக்கா முக்கிய பங்கு வகிக்கும் நிலையில், அமெரிக்காவைத் தவிர்ந்த ஏனைய நாடுகளுக்கான ஏற்றுமதியை அடுத்த பத்து ஆண்டுகளில் இரட்டிப்பாக்குவதே மார்க் கார்னியின் இலக்காக உள்ளது.
இதற்காகப் பல்வேறு நாடுகளுடன் வர்த்தக உறவுகளை விரிவுபடுத்தும் முயற்சியில் கனடா ஈடுபட்டுள்ளது.
இருப்பினும், கனடா–துருக்கி இடையிலான தற்போதைய வர்த்தகத்தின் அளவு ஒப்பீட்டளவில் குறைவாக இருப்பதால், இந்தப் புதிய ஒத்துழைப்புகள் நடைமுறையில் எந்தளவுக்குப் பொருளாதாரப் பலனை வழங்கும் என்பது எதிர்காலத்தில் தெரியவரும்.
