மலையாள திரையுலகின் முன்னணி நடிகரான மோகன்லால் நடிக்கும் புதிய திரைப்படமான ‘ஆபரேஷன் கங்கா’வின் ஃபர்ஸ்ட் லுக் போஸ்டர் வெளியாகியுள்ளது.
இயக்குநர் விஷ்ணு மோகன் இயக்கும் இப்படத்தில் மோகன்லால் முக்கிய கதாபாத்திரத்தில் நடிக்கிறார். இதன் மூலம் மோகன்லாலும் விஷ்ணு மோகனும் முதன்முறையாக இணைந்துள்ளனர். விஷ்ணு மோகன், உன்னி முகுந்தன் நடிப்பில் தேசிய விருது பெற்ற ‘மெப்படியான்’ திரைப்படத்தை இயக்கியவர்.
மோகன்லால் தனது எக்ஸ் தளப் பக்கத்தில் இப்படத்தின் ஃபர்ஸ்ட் லுக் போஸ்டரை பகிர்ந்துள்ளார். போஸ்டரில் நகரத்தின் மீது பிரம்மாண்டமான பெண் சிலை ஒன்று வாளும் கேடயமும் ஏந்தியபடி காட்சியளிக்கிறது. சிலையைச் சுற்றி அடர்த்தியான மேகங்கள் காணப்படுவதுடன், அருகில் போர் விமானம் ஒன்றும் இடம்பெற்றுள்ளது.
மேலும், போஸ்டரில் ‘Operation Ganga’ என்ற படத்தின் தலைப்புடன் ‘A Nation’s Promise’ என்ற வாசகமும் இடம்பெற்றுள்ளது.
இப்படத்தில் பாலிவுட் நடிகர் அர்ஜுன் ராம்பால், பாக்யஸ்ரீ போர்ஸ், ஆதில் ஹுசைன், பார்த்திபன் உள்ளிட்ட பலர் முக்கிய கதாபாத்திரங்களில் நடிக்கின்றனர். ‘துரந்தர்’ திரைப்படத்தின் இசையமைப்பாளர் ஷஷ்வத் சச்தேவ் இப்படத்திற்கும் இசையமைக்கிறார்.
‘ஆபரேஷன் கங்கா’ திரைப்படம் ரஷ்யா–உக்ரைன் போரின் பின்னணியில், உக்ரைனில் சிக்கியிருந்த இந்தியர்களை மீட்க இந்தியா மேற்கொண்ட ‘ஆபரேஷன் கங்கா’ வெளியேற்ற நடவடிக்கையை அடிப்படையாகக் கொண்டதாகத் தெரிவிக்கப்பட்டுள்ளது. திரைப்படத்தின் படப்பிடிப்பு ஜார்ஜியாவில் ஆரம்பமாகியுள்ளதுடன், போலந்து, கஜகஸ்தான், டெல்லி, டேராடூன் மற்றும் கொச்சி உள்ளிட்ட பல இடங்களிலும் படப்பிடிப்பு நடைபெறவுள்ளதாக தகவல்கள் வெளியாகியுள்ளன.
பிரம்மாண்டமான பட்ஜெட்டில் உருவாகும் இப்படத்தை கோகுலம் கோபாலன் தயாரிக்கிறார். பல்வேறு மொழி திரையுலகைச் சேர்ந்த முன்னணி நட்சத்திரங்கள் இணைந்துள்ளதால், ‘ஆபரேஷன் கங்கா’ மீது ரசிகர்களிடையே எதிர்பார்ப்பு அதிகரித்துள்ளது.
